प्रधानमन्‍त्री ओलीले भने- 'रेल कुनै जादु होइन, आजको भोलि आउने'

ल्हासा- प्रधानमन्त्री केपी ओलीले अगाडि बढाभएको ‘समृद्ध नेपाल सुखी नेपाली’को नारालाई चीन र भारतका दुवै सरकारले महत्वपूर्ण भनेका छन् । दुवै मुलुकले सरकारीस्तरमै स्वीकारेका छन् । नयाँ संविधान कार्यान्वयनमा आएपछि तीन तहको निर्वाचन सम्पन्न भई बनेको सरकारका कार्यकारी प्रमुखका रूपमा उत्तरी छिमेकी चीनको ६ दिने औपचारिक भ्रमण समापनको संघारमा तिब्बतको ल्हासामा रासससँग कुरा गर्दै प्रधानमन्त्री ओलीले नेपाल र चीनको सम्बन्ध असाधारण र अभूतपूर्व भएको बताए । 

प्रस्तुत छ, राष्ट्रिय समाचार समितिका हरि लामिछानेले प्रधामन्त्री ओलीसँग लिएको अन्तरवार्ताको सम्पादित अंश :

अत्यन्त व्यस्त भएर नेपाल र नेपालीका लागि लामो समय खटिनुभएको छ, कसरी मिलेको छ यो ऊर्जा ?

धेरै घण्टा काम गर्ने मेरो आदत नै बनेको छ । १७/१८ घण्टा काम गर्दा मलाई त्यस्तो असुविधा हुँदैन ।

चीन सरकारले उच्च सम्मानका साथ यहाँलाई स्वागत गर्यो, योसँगै १४ बुँदे संयुक्त विज्ञप्ति जारी भई नै सकेको छ, सारमा यसबाट हामी कत्तिको उत्साहित हुन सक्छौँ ?

स्वाभाविक रूपमा चीन हाम्रो लगत्तैको मित्रराष्ट्र मात्र होइन, एउटा भरपर्दो तथा सधैंको सहयोगी मित्रराष्ट्र पनि हो । कुनै समस्या नभएको मित्रराष्ट्र हो र हामीलाई सहयोग गर्दै आएको मित्रराष्ट्र हो । यसभन्दाअघि मार्च २०१६ मा मैले चीन भ्रमण गरेका बेला जुन सहमति भएको थियो, जुन संयुक्त प्रेस विज्ञप्ति प्रकाशित भएको थियो । त्यसबेलाका कुरा नै ऐतिहासिक हुन् । नेपाललाई नयाँ युगमा प्रवेश गराउने र नेपाल-चीन सम्बन्धलाई नयाँ उचाइमा पुर्याउने ती सम्झौता संयुक्त विज्ञप्तिले देखाएका थिए । तीनै सम्झौतालाई आगडि बढाउने र अरू थप समयानुकूल लिने हाम्रा आवश्यकता हुन् । तदनुसार नै हामीले कुराकानी गर्यौं, हामी यथार्थमा आशावादी नहुनुपर्ने कारण नै छैन ।

हामी आशावादी भएका छौं । हाम्राबीचमा भएका थुप्रै सहमतिह र संयुक्त रूपमा जारी गरेको प्रेस विज्ञप्तिमा त्यो विषय उल्लेख भएको छ । सरकारी र निजी क्षेत्रको लगानी अभिवृद्धि र सरकारी क्षेत्रका सहयोगका पक्षहरू सबै कुरामा हामी अगाडि बढेका छौँ । त्यसमा कोही पनि असन्तुष्ट हुनुपर्ने कारण नै छैन ।

प्रधानमन्त्रीज्यू, यो भ्रमणको सबैभन्दा चासोको विषय रेलमार्ग थियो, बेइजिङमा भएको सहमतिले केरुङ-काठमाडौं रेलमार्गको सम्भावनालाई कत्तिको बलियो बनाएको छ ?

अवश्य नै यो सर्वेक्षण गरिनसकेको विषय हो । अहिलेसम्म हाम्रो इच्छामा निर्भर रहेको विषय हो । चिनियाँ राष्ट्रपति सी चिनपिङले काठमाडौंसम्म रेल पुर्याउने आफ्नो भिजनका सम्बन्धमा स्पष्ट पार्नुभएको थियो । यो रेल सिगात्से पुगेको छ, अब त्यहाँबाट केरुङ हुँदै काठमाडौं र पोखरा तथा लुम्बिनीसम्म पुग्ने हो । अहिलेको हकमा काठमाडौं न्यूनतम गन्तव्य हो ।

यसमा मानिसहरू अनौठो के मान्छन् भने दुनियाँ कहाँबाट कहाँ पुगिसक्यो तर हामीले इनल्यान्ड वाटरवेज (आन्तरिक जलमार्ग) को कुरा गर्दा, नदीको बाटोबाट पानीजहाज चलाउँदा पनि अनौठो माने मान्छेले । तर, हामी काम गर्दैछौं र हामी छिटै शुरु गर्दैछौं । हामीले बन्दरगाह चलाउँछौं, पानीजहाज चलाउँछौं भन्दा पनि अनौठो माने । हामीले वैकल्पिक मार्गहरू र पारवहनको बन्दोबस्त गर्छौं भन्दा अनौठो माने । अरू कतिपयले हामीले नेपाललाई आधुनिक युगमा स्तरोन्नति गर्ने कुरा गर्दा अनौठो माने । तर, यो अनौठो मान्नुपर्ने कुरा होइन । 

अबको समयमा राजनीतिक र कूटनीतिक सम्बन्धका हिसाबले प्रणाली, सामाजिक प्रबन्धका हिसाबले, सुशासनका हिसाबले अथवा आर्थिक विकासका हिसाबले कसरी अगाडि जाने नेपाल? त्यसैले मैले समृद्ध नेपाल, सुखी नेपालीको नारा दिएको हो । त्यो अकारण छैन । त्यसैअन्तर्गत् हाम्रो रेलको सम्बन्धमा कुनै देशबाट ल्याएर हाम्रो सिमानासम्म थुतुनो मात्र घुसार्ने रेलको कुरा गरेको होइन । पूर्व-पश्चिम रेलको कुरा, राजधानीसम्म आउने रेलको कुरा, काठमाडौं-पोखरा जाने रेलको कुरा, काठमाडौं उपत्यकाभित्र चल्ने रेलको कुरा अथवा थानकोट-धुलिखेल चल्ने रेल अथवा काठमाडौं-वीरगञ्ज चल्ने रेलको कुरा नेपाललाई आधुनिक युगमा प्रवेश गराउने कनेक्टिभिटी (सम्पर्क सञ्जाल) हो । सम्पर्क सम्बन्धका, आवागमनका, परिवहनका सबै माध्यम र सूचना र सम्बन्धका सबै क्षेत्रलाई आधुनिक ढंगबाट विकासका लागि प्रयोग गर्नुपर्छ । त्यसो भएकाले रेलमार्गसम्बन्धी प्रश्न फेरि उठेको छ र यसको अध्ययन टुंग्याउने र कामहरू अगाडि बढाउने अवधारणामा हामी गएका छौं ।

नेपाली कार्गो ट्रान्सपोर्टका लागि बेइजिङमा सहमति भएको र त्यसलगत्तै प्रधानमन्त्रीज्यूसँग तिब्बतको सरकारका प्रमुखले पनि भेटवार्ता गर्नुभयो । त्यो सहमति र भेटवार्तालाई एकै ठाउँमा राखेर हेर्दा अब नेपालीले कस्तो लाभ लिन सक्छन् ?

त्यो सहमति भएको छ । हामीलाई हाम्रै उत्तरी भेगमा एक ठाउँबाट अर्को स्थानमा पुर्याउनका लागि धेरै ठूलो समस्या थियो । अथवा, उत्तरी भूभागको एक ठाउँबाट अर्को भूभागमा जान मात्र होइन कि औषधि पुर्याउनु परेमा, राहत तथा उद्धारका सामग्री पुर्याउनु परेमा, महामारीको बेलामा आवश्यक सामग्री पुर्याउनु परेमा अप्ठ्यारो थियो । त्यस्तो बेलामा अस्थायी रूपमा आग्रह गरेर तिब्बती राजमार्ग प्रयोग गर्ने गथ्र्यौं । जतिबेला समस्या पर्छ, त्यतिबेला काम शुरु गथ्र्यौँ । 

अब त्यो अवस्था अन्त्य भएको छ । हामीले तत् सम्बन्धमा चीनको तिब्बतको राजमार्गलाई प्रयोग गर्न सक्ने र उत्तरी भेगको कुनै पनि भेगमा हामीले सामान पुर्याउन सक्ने भएका छौं । धैरै अनुकूलता भएको छ । अब तिब्बत सरकारका प्रमुखसँग मैले दुईपल्ट कुरा गर्दा उहाँहरू यसमा अत्यन्त सकारात्मक हुनुहुन्छ । उहाँहरूको भावना सकारात्मक छ । उहाँहरूको सहयोग सकारात्मक ढंगले सहयोगी भावनाका साथ अगाडि बढ्छ ।

यहाँले पटक-पटक भन्दै आउनुभएको परियोजनाभन्दा ठूलो मित्रता हो भनेर मित्रताको कसीलाई हेर्दा यो भ्रमणले दुई देशबीचको सम्बन्धको उचाइलाई कहाँ पुर्याएको छ, यसलाई कसरी
लिनुभएको छ ?

यो त असाधारण छ, अपूर्व छ । सन् २०१६ को सहमति र संयुक्त विज्ञप्ति असाधारण थियो । त्यसै गरेर यसले त्यसैलाई अझ अगाडि बढाएको छ । असाधारण छ, यो अभूतपूर्व छ ।

यहाँको सक्षम नेतृत्वमा देशले बहुआयामिक ढोका खोल्दैछ, नेपाल-चीन र नेपाल-भारतका विषयमा जति पनि कुरा आएका छन्, असल छिमेकीको सम्बन्ध राखेर जानुपर्ने अवस्थामा चीनका राष्ट्रपति सीसँग आधा घण्टाभन्दा बढी समय व्यक्तिगत वार्ता गर्नुभयो । के नयाँ युगमा नयाँ दृष्टिकोण बन्दै गएको हो भन्न सकिन्छ ?

अवश्य नै, चिनियाँ राष्ट्रपतिज्यूसँग मेरो ३५-४० मिनट व्यक्तिगत कुराकानी भयो । त्यसपछि ३५-४० मिनटजति समूहमा कुरा भए । त्यसपछि सम्माननीय प्रधानमन्त्री ली खछ्याङसँग एक घण्टा वार्तास्थलमा कुराकानी भयो । एक घण्टाभन्दा बढी व्यक्तिगत रूपमा कुराकानी भए । त्यसले सम्बन्धलाई बहुआयामिक ढंगले सुदृढ गर्न बहुतै महत्वपूर्ण भूमिका खेलेको छ ।
 
यतिबेला म भन्न चाहन्छु, नेपालले कुनै हल्काफुल्का क्षणिक कूटनीति गर्न चाहेको छैन, गरिरहेको छैन, गर्न चाहिरहेको छैन । कसैले कार्ड प्रयोग गर्ने भन्ने शब्दावली प्रयोग गर्छन्, उत्तरी कार्ड, दक्षिणी कार्ड भन्ने प्रयोग गर्छन् । हामी कार्ड प्रयोग गर्ने होइन, मित्रता अगाडि बढाउन चाहन्छौं, दुवै छिमेकीसँग । यसभित्र कुनै कार्ड खेल्न खोजिने हाम्रो मनसाय हुन पनि सक्दैन, छँदा पनि छैन । र, हामी त्यस्ता कुरामा विश्वास गर्दैनौं । हामी मित्रतामा विश्वास गर्छौं । हाम्रो मित्रता र हामी हाम्रा छिमेकीसँग पनि मित्रता अभिवृद्धिका लागि हाम्रो मित्रता उपयोग हुन सकोस् । हामी अरूको मित्रतामा सहयोगी हुन सकूँ, त्यो भूमिका खेल्न सकूँ भन्ने चाहन्छौं ।

अन्तमा, चीन भ्रमणमा हुनुहुन्छ, केही समयअघि भारतको भ्रमण गर्नुभयो, जनता व्यग्र प्रतीक्षामा छन् । चीन भ्रमणको स्पष्ट सन्देश के हो ?

व्यावहारिक रूपमा त मैले भारत भ्रमण गरें । त्यसपछि भारतका प्रधानमन्त्री नरेन्द्र मोदीले नेपालको भ्रमण गर्नुभयो । त्यसपछि फटाफट काम हुन थाल्यो । त्यो व्यवहारमा देखिएको छ। चीन भ्रमणका उपलब्धि पनि क्रमशः देखिँदै जानेछन् । रेलजस्तो कुरा आजको भोलि कुनै जादु होइन तर सर्वे तुरुन्त प्रारम्भ हुन्छ । प्रक्रिया शुरु हुन्छ । विभिन्न जलविद्युत् आयोजना, औद्योगिक पार्कहरू र उद्योगहरू तथा सहयोगका क्षेत्रहरू विस्तार हुन्छन्, काम शुरु हुन्छ । र, द्रूतगतिले काम शुरु हुन्छ । त्यसैले यी सबै कुरा प्रमाणित हुन्छ ।

मानिसहरू सोचिरहेका हुन्थे, कूटनीति भनेको नबोल्नु, चुप लाग्नु हो । कतिले जे गरे पनि सहनुलाई कूटनीति ठान्ने, कतिले एकतिर ढल्कनुलाई कूटनीति ठान्ने र कतिले चिप्ला कुरालाई कूटनीति
ठाने । होइन, हामी त राष्ट्रिय हितलाई केन्द्र भागमा राखेर न्यायोचित कुरालाई केन्द्रमा राखेर, अन्तर्राष्ट्रिय कानुन र प्रतिबध्दतालाई केन्द्रमा राखेर न्यायोचित ढंगले अगाडि बढ्छौं । र, मैत्रीभावलाई सबैभन्दा मुख्य स्थानमा राखेर अगाडि बढ्छौं भने हाम्रा नीतिहरू ठीक छन्, सही छन् । हामी यी नीतिमा सफलताका साथ अगाडि बढेका छौं, जो व्यवहारले देखाएको छ ।