इरानसँगको महत्वपूर्ण सीमा क्षेत्र अफगानी तालिबानको कब्जामा

एजेन्सी- अफगानिस्तानको तालिबान विद्रोही संगठनले इरानसँगको महत्वपूर्ण सीमा नाका पर्ने जिल्ला कब्जामा लिएको छ। मुलुकका थुप्रै जिल्ला कब्जा गरिसकेको तालिबान समूहले यो सीमा क्षेत्र शुक्रबार कब्जा गरेको हो।

पछिल्लोपटक सार्वजनिक भएको एक भिडियो फुटेजमा तालिबानी बलले इरानसँगको सीमामा जोडिएको इस्लाम क्वालास्थित सीमा शुल्क कार्यालयको छतबाट अफगानिस्तानको झण्डा निकालिरहेको देखिन्छ।

यो सीमा शुल्क कार्यालयबाट अफगानिस्तान सरकारले मासिक झण्डै २ करोड डलर बराबरको राजस्व संकलन गर्दै आएको छ। अमेरिकाले आफ्नो सैनिक फिर्ता लिन थालेपछि तालिबान समूहले अफगानिस्तानका विभिन्न जिल्लामा तीव्र रुपमा आफ्नो नियन्त्रण जमाइरहेको छ।

तालिबान अधिकारीहरुले देशको ७५ प्रतिशत क्षेत्र नियन्त्रणमा लिइसकेको बताएका छन्। स्वतन्त्र रुपमा पुष्टि हुन नसकेको यो दाबीलाई सरकारले भने अस्वीकार गर्दै आएको छ।

गत हप्ता तालिबानी समूहले इरान, ताजिकिस्तान, तुर्कमेनिस्तान, चीन र पाकिस्तानको सीमा जोडिएका जिल्लाहरु कब्जा गरिसकेको छ।