विकास र समृद्धिमा दलहरूको नेतृत्वदायी भूमिका : ओली

बेइजिङ- प्रधानमन्त्री केपी ओलीले राजनीतिक दलहरू विकास, समृद्धि र सुशासनका लागि नेतृत्वदायी पात्र रहेको बताएका छन् । 

चिनियाँ कम्युनिस्ट पार्टीको केन्द्रीय पार्टी स्कुलमा आयोजित कार्यक्रमलाई बिहीबार सम्बोधन गर्दै ओलीले भने, ‘राजनीतिक दलहरूले मुलुकको वर्तमान कोर्स मात्र होइन, भविष्यको दिशा पनि निर्दृष्ट गर्नुपर्छ ।’

कार्यक्रमको विषय थियो, ‘सुशासन र समृद्धिमा राजनीतिक दलहरूको भूमिका ।’ नयाँ धारणा सिर्जना गर्न पार्टी स्कुलको भूमिका, सुशासन र समृद्धिको प्रत्याभूतिका लागि राजनीतिक दलहरूको भूमिका, क्रान्ति र समृद्धिबीच तादात्म्य मिलाउने नेपालको अनुभव, विश्व सन्दर्भमा सामाजिक आन्दोलनबारे प्रधानमन्त्री ओलीले बोलेका थिए । 

प्रधानमन्त्री ओलीले त्यस अवसरमा नेपाल र चीनबीचको सम्बन्धका आधारहरू बारे पनि बोलेका थिए ।