चक्कु प्रहार गरी हत्या गर्ने दुई जना पक्राउ

काठमाडौं- काठमाडौंमा धारिलो हतियार प्रहार गरी एक जनाको हत्या गर्ने दुई जनालाई आज प्रहरीले पक्राउ गरेको छ। 

चन्द्रागिरि नगरपालिका–३ थानकोट बस्ने महोत्तरीको जलेश्वर नगरपालिका–२ का २० वर्षीय जितेन्द्र साहको आइतबार धारिलो हतियार (चक्कु) प्रहार गरी हत्या गरेको अभियोगमा चन्द्रागिरि–३ थानकोट बस्ने ३६ वर्षीय सोमलाल गोपाली र मकवानपुर दामन घर भएका २५ वर्षीय मनोज दोङ तामाङलाई पक्राउ गरिएको हो। 

चन्द्रागिरि–३ थानकोटमा आइतबार राति उनीहरुसहित तीन जनाको समूहले चक्कु प्रहार गर्दा साहलाई गम्भीर घाइते भएका साहको राष्ट्रिय ट्रमा सेन्टरमा उपचारका क्रममा सोमबार मृत्यु भएको थियो। उक्त घटनामा संलग्न व्यक्तिको खोजी गर्ने क्रममा गोपालीलाई चन्द्रागिरि–३ थानकोट र तामाङलाई सोही नगरपालिका–१ दहचोकबाट पक्राउ गरिएको महानगरीय प्रहरी परिसरका प्रहरी उपरीक्षक रमेशकुमार बस्नेतले जानकारी दिए।

घटनामा संलग्न एक व्यक्तिको खोजी जारी रहेको छ। पक्राउ परेका दुईविरुद्ध कर्तव्य ज्यानसम्बन्धी कसूरमा थप अनुसन्धान भइरहेको महानगरीय प्रहरी वृत्त थानकोटले जनाएको छ। रासस