विश्वकप : उरुग्वे र रुस अन्तिम १६ मा प्रवेश

एजेन्सी- साउदी अरेबियालाई पराजित गर्दै उरुग्वेले विश्वकप फुटबल प्रतियोगिताको अन्तिम १६ मा स्थान पक्का गरेको छ ।

पहिलो खेलमा इजिप्टलाई हराएको उरुग्वेले बुधबार राती साउदी अरेबियालाई पन्छाउँदै ६ जोडेर नकआउट चरणमा पुगेको हो । 

समुह ए बाट उरुग्वेसंगै आयोजक राष्ट्र रुस पनि अन्तिम १६ मा पुगेको छ । दुबै देशको समान ६ अंक छ । रुसले पहिलो खेलमा साउदीलाई हरायो भने दोस्रो खेलमा इजिप्टलाई पराजित गरेको थियो ।

समुह ए मा रहेका इजिप्ट र साउदी अरेबिया हालसम्म अंक विहिन छन् । यी दुबै देश समुहचरणबाटै बाहिरीएका छन् । 

यद्यपी समूह चरणको अन्तिम खेल भने चारै राष्ट्रले खेल्न बाँकी छ । उरुग्वे र आयोजक रसियाबीचको अन्तिम खेलले समूह ए को विजेता र उपविजेताको टुंगो लाग्ने छ ।

बुधबार राती भएको खेलमा साउदीलाई उरुग्वेले १–० गोल पराजित गरेको हो । खेलको २३ औं मिनेटमा लुइस स्वारेजले गरेको गोल नै निर्णयक बन्यो । 

खेलमा राम्रो प्रदर्शन गरेपनि साउदीले कुनै गोल गर्न सकेन । खेलमा दुबै टिमले गोल गर्ने राम्रो अवसर खेर फालेका थिए ।