प्रदेश १ : माओवादीद्वारा प्रदेशसभा बैठकमा निरन्तर अवरोध

विराटनगर- प्रदेश १ सभाको बैठक आइतबार तेस्रोपटक पनि अवरुद्ध भएको छ। माओवादी केन्द्रको अवरोधका कारण आइतबार पनि बैठक बस्न सकेन।  

प्रदेशसभा बैठक सुरु हुनेवित्तिकै माओवादी सांसदहरुले उठेर विरोध गरेपछि उपसभामुख सरस्वती पोखरेलले सोमबारसम्मका लागि बैठक स्थगित गरिन्। 

आइतबारको बैठकअघि प्रदेशसभा सचिवालयमा आयोजित छलफल निष्कर्षविहीन भएको थियो। बैठकमा सहभागीहरुले मन्त्रीको अभिव्यक्ति रेकर्डबाट हटाउनुपर्ने बताएका छन्। 

मुख्यमन्त्री शेरधन राईले सांसदले उत्तेजित बनाएपछि मन्त्रीले त्यसरी बोलेको भन्दै दुवै जनाको अभिव्यक्ति रेकर्डबाट हटाउनु पर्ने बताएका थिए। मुख्यमन्त्रीको भनाइ माओवादीले अस्वीकार गरेपछि छलफल निष्कर्षविहीन भएको थियो।

भौतिक पूर्वाधार विकासमन्त्री अम्बिरबाबु गुरुङ सदनमा अमर्यादित ढंगले प्रस्तुत भएको र उनले प्रदेशसभा सांसद मोहनकुमार खड्काविरुद्ध व्यक्तिगत लाञ्छना लगाउँदै बोलेको भन्दै उनले माफी माग्नुपर्ने माग माओवादीले गर्दै आएको छ।