२०७९ वैशाख ३० भित्र महाधिवेशन सक्ने एमाले महासचिवको प्रस्ताव

काठमाडौं- नेकपा एमालेका महासचिव ईश्वर पोखरेलले आगामी वर्ष वैशाखभित्र महाधिवेशन सक्ने गरी तयारी अघि बढाउन प्रस्ताव गरेका छन्।

शनिबार बालुवाटारमा भएको एमाले अध्यक्ष केपी शर्मा ओलीपक्षीय केन्द्रीय कमिटी बैठकमा महासचिव पोखरेलले यस्तो प्रस्ताव पेस गरेका हुन्। 

'वैशाख ३०, २०७९ मा कुनै पनि हालतमा महाधिवेशन गरी सक्नुपर्छ। कानुनी रूपमा पनि छिटो गर्नुपर्ने अवस्था रहेको छ। किनभने मंसिरमा हुने चुनाव र फागुनमा स्थानीय तहको निर्वाचन छ,' उनले भने, 'त्यसैले चुनाव सकिएपछि पार्टीलाई महाधिवेशन तर्फ लैजानुपर्छ।'

उनले आयोजक कमिटी गठन गरी चार वटा बैठक गरेपनि अदालतको अमान्य भनेपछि विघटन गरिएको बताएका थिए। 

हाल चलिरहेको बैठकलाई उनले एमाले र माओवादी केन्द्रबीच एकता हुनुअघिकै हैसियतको भएको समेत दाबी गरेका थिए। 'केन्द्रीय कमिटी बैठक  जेठ २ मा जुन नेतृत्व थियो त्यसैको बैठक गर्दैछौँ,' उनको दाबी छ। 

पार्टी राजनीति असहज र उतारचढावबाट गुज्रिएको उनको भनाइ थियो। 

उनले पार्टीको सदस्यता नवीकरण गर्ने असार मसान्तको समयसीमा तोकिएको समेत बताए। 'साउन ५ भित्र देशभरबाट सदस्यता अधावधिक भई सक्नुपर्ने छ। विधान संसोशन प्रस्ताव असार २५ भित्र मातहत कमिटीमा पठाउने र त्यसको सुझाव साउन १५ मा केन्द्रमा पठाई सक्नुपर्ने छ,' उनको भनाइ थियो।