एमाले केन्द्रीय कमिटी बैठक बस्दै, असन्तुष्ट माधव-झलनाथ पक्ष सहभागी नहुने

काठमाडौं- सत्तारुढ दल नेपाल कम्युनिस्ट पार्टी (एमाले) को केन्द्रीय कमिटी बैठक आज बस्दै छ। प्रधानमन्त्री निवास बालुवाटारमा बिहान ११ बजे पार्टीको केन्द्रीय कमिटी बैठक बस्न लागेको हो। असार १६ गते दसौं राष्ट्रिय महाधिवेशन आयोजक कमिटी भंग गरेर एमालेले केन्द्रीय कमिटीमा रुपान्तरण गरेपछि आज बैठक बस्न लागेको हो।

सर्वोच्च अदालतको जेठ २७ ले महाधिवेशन आयोजक कमिटीलाई वैधानिकता नदिनु र पार्टीभित्रकै असन्तुष्ट पक्षको समेत माग सम्बोधन गर्ने भन्दै केन्द्रीय कमिटीमा रुपान्तरण गर्ने निर्णय गरेर बैठक बोलाइए पनि सार्थक हुने देखिएको छैन। 

किनभने संस्थापन पक्षले आजका लागि बोलाएको केन्द्रीय कमिटीको बैठकमा असन्तुष्ट माधव झलनाथ पक्षले सहभागिता नजाउने निर्णय गरेको छ। 

यो पक्षको बिहीबार बसेको स्थायी कमिटीका नेताहरूको बैठकले अहिलेकै स्थितिमा केन्द्रीय कमिटीको बैठकमा सहभागी नहुने निर्णय गरेको हो। 

ओली पक्षले केन्द्रीय कमिटी २०७५ जेठ २ को अवस्थाकै भएको दाबी गरेको छ। तर, त्यसमा माओवादीबाट आएका नेताहरूलाई समेत समावेश गरिएकाले नेपाल पक्षले जेठ २ मा फर्केको भन्न नमिल्ने भन्दै आजको बैठकमा सहभागी नहुने निर्णय गरेको नेता युवराज ज्ञवालीले जानकारी दिए। 

‘ओलीले बोलाएको बैठक अवैध छ, सहमतिअनुसार बोलाइएको पनि हैन, त्यसैले हामीले त्यो बैठकमा नजाने निर्णय गरेका छौँ,’उनले भने।

ज्ञवालीले पार्टी एकताका लागि औपचारिक वार्ता गर्नुपर्ने भनेको छ।

बिहीबार एमाले एकताको प्रयासमा रहेका दुवै पक्षका नेताहरू छलफलमा जुटेका थिए। तर, ठोस सहमति हुन नसकेपछि निष्कर्षविहीन भएको थियो। 

संस्थापन पक्षले गरेको निर्णय र असन्तुष्ट पक्षको अडानकै बीच एमाले एकताको प्रक्रियाले गति लिने संकेत देखिएको छैन।