प्रदेससभा सदस्यबाट निलम्बनमा परेकी ज्वाला साह मन्त्री बन्दै

जनकपुरधाम- माओवादी केन्द्रले नेकपा एमालेमा लागेको भन्दै प्रदेशसभा सदस्य पदबाट निलम्बनमा परेकी महिला नेत्री ज्वाला साह केन्द्रीय मन्त्री बन्न लागेकी छन्। प्रदेश २ मा माओवादी केन्द्रले कारबाही गरेकी नेत्री साह नेपाल सरकारको कृषि मन्त्री बन्न लागेकी हुन्।

माओवादी केन्द्र छोडेर एमालेमा लागेकी साहलाई बिहीबार प्रधानमन्त्री केपी शर्मा ओलीले विस्तार गर्न लागेको मन्त्रीमण्डलमा कृषि मन्त्री बनाउन लागिएको हो।

यसअघि माओवादी केन्द्रको केन्द्रीय सदस्य पदको जिम्मेवारी बहन गरिसकेकी साह प्रदेश २ को प्रदेशसभामा निर्वाचित भएकी थिइन्। उनी बाराको क्षेत्र नम्बर ३ को (क) बाट प्रदेशसभा सदस्य पदमा निर्वाचित भएकी थिइन्। 

सर्वोच्च अदालतले नेकपाको एकता खारेज गरेपछि साह ओलीतिर नै लागेको भन्दै माओवादी केन्द्रले साहसहित चार जना प्रदेशसभा सदस्यलाइ निल्म्बन गरेको थियो।

माओवादीबाट कारबाहीमा परेकी साह अहिले एमालेको प्रदेश २ अध्यक्ष हुन्। उनी नेता प्रभु साह निकटको नेत्री हुन्।