दीपक मनाङे आज पनि प्रदेशसभामा गयल

पोखरा- गण्डकी प्रदेशका युवा तथा खेलकुद मन्त्री दीपक मनाङे आजको प्रदेशसभा बैठकमा अनुपस्थित भएका छन्।

बुधबार रातिदेखि मुख्यमन्त्री पृथ्वीसुव्वा गुरुङलाई साथ नदिने बताउँदै आएका मनाङे बिहीबार बिहानैदेखि सम्पर्क बिहीन छन्। उनी र उनका स्वकीय सचिव रोनित गुरुङ्को समेत मोवाइल अफ छ। 

मुख्यमन्त्रीले आज सदनबाट विश्वासको मत लिन लागेका बेला उनी सदनमा दोस्रोपटक अनुपस्थित भएका हुन्। यसअघि वैशाख १५ गते नयाँ मुख्यमन्त्री पदमा मतदान हुने दिन पनि उनी सदनमा अनुपस्थित भएका थिए। सो दिन उनीसँगै राष्ट्रिय जनमोर्चाका सांसद खिमबिक्रम शाही पनि बिरामी भएर अस्पतालको आईसीयूमा भेटिएका थिए। 

आफूविरुद्ध अविश्वासको प्रस्ताव पेश भएपछि बहुमत जुटाउन मनाङेलाई गुरुङ्ले सामाजिक विकास मन्त्रालय फुटाएर युवा तथा खेलकुद मन्त्री बनाएका थिए। तर, उनी अन्तिम समयमा आएर मुख्यमन्त्रीको कित्ताबाट बाहिरिएका छन्। 

बुधबार राति छोटो प्रतिक्रिया दिँदै उनले प्रदेशसभामा जुन पक्षको ३१ मत पुग्छ उसैलाई समर्थन गर्ने बताएका थिए। प्रदेश सभालाई विघटनको खतराबाट जोगाउन यसो गरेको उनको तर्क थियो।