साढे चार घण्टाको छलफलपछि सुवास नेम्वाङले भने– पार्टी एकता जोगाउनुपर्छ भन्ने धारणा सबैको छ

काठमाडौं– नेकपा एमालेको विवाद मिलाउन जुटेका दोस्रो तहका नेताहरुबीचको छलफल सकिएको छ। ललितपुरको एक होटलमा करिब साढे ४ घण्टा छलफल गरेर नेताहरु निस्किएका छन्। 

होटलबाट बाहिरिने क्रममा केपी ओली पक्षका नेता सुवास नेम्वाङले पार्टी एकताको लागि छलफल र वार्ता जारी रहेको प्रतिक्रिया दिए। ‘पार्टी एकताको पक्षमा हामीबीच निरन्तर छलफल चलिरहेको छ। यो जारी रहन्छ। पार्टी एकतालाई जोगाउनुपर्छ भन्ने नै सबैको धारणा रहेको छ,’ उनले भने।

माधव नेपाल पक्षका नेता गोकर्ण विष्टले पनि पार्टी एकतालाई कसरी जोगाउन सकिन्छ भन्ने विषयमा नै आज छलफल भएको बताए। ‘सबैको धारणा एकतालाई जोगाउने भन्ने नै छ,’ उनले भने।

छलफलमा संस्थापन अर्थात् केपी ओली पक्ष र असन्तुष्ट समूहका दोस्रो तहका नेताहरु सहभागी छन्। बैठकमा संस्थापन पक्षबाट सुवासचन्द्र नेम्वाङ, विष्णु पौडेल, प्रदीप ज्ञवाली र विष्णु रिमाल सहभागी छन् भने माधव नेपाल पक्षबाट सुरेन्द्र पाण्डे, गोकर्ण विष्ट, भीम आचार्य र घनश्याम भुसाललगायत नेताहरुको सहभागिता थियो।

अध्यक्ष केपी ओलीले यसबीचमा भएका छलफलको सहमति बमोजिम नै ०७५ जेठ ३ अघिको अवस्थामा फर्किने लिखित प्रतिवद्धता सार्वजनिक गरे पनि माधव नेपाल पक्षले अस्वीकार गरेको छ।