चालक सिटमा बेहाेस भेटिएका ढकाल कहिल्यै नफर्किने भए

विराटनगर- सरकारी गाडीभित्र बेहोस भेटिएका जलस्रोत तथा सिँचाई विकास डिभिजन कार्यालय सुनसरीका चालक ३८ वर्षीय राजु ढकालको मृत्यु भएको छ। आफैले चलाउँदै आएको कार्यालयको प्रदेश १–०४–००१ झ ०००६ नम्बरको गाडीभित्रै उनलाई मंगलबार दिउँसो ३ बजेतिर बेहोस अवस्थामा फेला पारिएको थियो। 

मोरङ प्रहरीका प्रवक्ता डीएसपी मानबहादुर राईका अनुसार चालक सिट पल्टाएर सुतेजस्तो अवस्थामा बेहोस भेटिएका ढकाललाई तत्काल उद्धार गरेर उपचारका लागि लगिएको थियो। उपचारका लागि नोबेल शिक्षण अस्पताल पुर्‍याउनासाथ चिकित्कसले मृत घोषित गरेको राईले बताए। 

गाडीको झ्याल र ढोकाका सबै सिसा बन्द गरिएको अवस्थामा चालक ढकाल विराटनगर महानगरपालिका–३ मा बेहोस भेटिएका थिए। घटनास्थल प्रदेश १ का मुख्यमन्त्री शेरधन राईको निवास अगाडि पर्छ। 

डेराबाट गाडी लिएर उनी बिहान १० बजेतिर आफ्ना कार्यालय प्रमुखलाई लिन विराटनगरस्थित प्रदेश १ को भौतिक पूर्वाधार विकास मन्त्रालयतर्फ गएको पाइएको प्रहरीले जनाएको छ। 

उदयपुरको बेलका नगरपालिका–३ घर भएका चालक ढकाल विराटनगर महानगरपालिका–३ पुष्पलाल चोकमा डेरा बस्दै आएका थिए। डेराबाट गाडी लिएर उनी बिहान १० बजेतिर आफ्ना कार्यालय प्रमुखलाई लिन विराटनगरस्थित प्रदेश १ को भौतिक पूर्वाधार विकास मन्त्रालयतर्फ गएको पाइएको प्रहरीले जनाएको छ। 

जलस्रोत तथा सिँचाई विकास डिभिजन कार्यालय सुनसरीका प्रमुख चूँडाराज ढकाल मन्त्रालयकै क्वार्टरमा बस्छन्। उनले आफूलाई लिन आउनुपर्ने चालकलाई बेहोस अवस्थामा फेला पारिएको खबर आएको र हेर्न जाँदा मृत्यु भएपछि आफूले भेटेको जानकारी दिए। अस्पतालले भने सबै सीसाहरु बन्द गरिएका कारण गाडीभित्र अक्सिजनको आपूर्ति रोकिएर श्वास फेर्ननसक्दा चालकको मृत्यु भएको हुनसक्ने जनाएको छ।