मन्त्रिपरिषद् विस्तारविरुद्धको रिट न्यायाधीश ईश्वर खतिवडाको इजलासमा

काठमाडौं- प्रधानमन्त्री केपी शर्मा ओलीले गरेको मन्त्रिपरिषद् विस्तारविरुद्ध सर्वोच्च अदालतमा दर्ता भएका रिटको सुनुवाइ न्यायाधीश ईश्वर खतिवडाको एकल इजलासमा तोकिएको छ।

वरिष्ठ अधिवक्ता दिनेश त्रिपाठी, अधिवक्ता राजकुमार सुवाल, शालिकराम सापकोटा, सीतादेवी अधिकारी, कंचनकृष्ण न्यौपाने र वीरेन्द्रप्रसाद साहले राष्ट्रपति कार्यालयसमेतलाई विपक्षी बनाएर सोमबार रिट दायर गरेका थिए।

भिडियो कन्फरेन्सिङ्ग माध्यमबाट मुद्दाको सुनुवाइ हुन लागेको सर्वोच्च अदालतले जनाएको छ। ६ वटा रिट भन्दा अघि खतिवडाकै इजलासमा अर्को बन्दीप्रत्यक्षीकरणको रिटसमेत रहेको छ। 

संसद् विघटन गरी मध्यावधि चुनाव घोषणा गरेर कामचलाउ बनेको सरकारले संविधानविपरीत मन्त्रिपरिषद् विस्तार गरेको भन्दै त्यसविरुद्ध रिट दर्ता गरिएको हो। आजको सुनुवाइले अन्तरिम आदेश जारी गरेमा हालै मन्त्री बनेकाहरूको पद गुम्ने छ।

गत शुक्रबार प्रधानमन्त्री ओलीले जसपाको महन्थ ठाकुर–राजेन्द्र महतोलाई सरकारमा सहभागी गराउँदै मन्त्रिपरिषद् विस्तार गरेका थिए।