ओलीको प्रस्तावपछि योगेश भट्टराईले भने– अब शीर्ष नेतृत्वबीच सार्थक संवाद हुनेछ 

काठमाडौं– एमाले माधवकुमार नेपाल समूहका नेता योगेश भट्टराईले पार्टी एकताका लागि आइतबार साँझ केपी ओलीले गरेको प्रस्तावले पार्टीको शीर्ष नेतृत्वको बीचमा सार्थक संवाद हुने प्रतिक्रिया दिएका छन्। ओलीको प्रस्तावको स्वागत गर्दै भट्टराईको यस्तो प्रस्ताव आएको हो। उनले सामाजिक सञ्जालमा लेखेका छन्, ‘नेकपा एमालेको एकतालाई अक्षुण्ण राख्न मद्द पुग्ने अपेक्षा गर्दछु। हजार माइलको यात्रा पहिलो पाइलाबाट नै सुरु हुन्छ।’

उनले ओलीले एमालेको एकताका लागि सार्वजनिक गरेको आह्वान मूलतः सकारात्मक रहेको उल्लेख गरेका छन्। भट्टराईले भनेका छन्, ‘ कार्यदल स्तरको छलफललाई यो वक्तव्यले  निरन्तरता दिन बाटो खुलेको छ। पार्टीका जिम्मेवार नेता सम्मिलित कार्यदलले स्पष्ट गर्नुपर्ने र मिलाउनुपर्ने थप विषयलाई समाधान गर्नेछ।’

भट्टराईले सर्वोच्चमा विचाराधीन विषयमा सबै सम्भावनालाई ख्याल गर्दै र मूलतः संविधानको रक्षा, लोकतान्त्रिक प्रकृयाको निरन्तरता र पार्टी एकताको खातिर एउटा तार्किक निष्कर्षमा पुग्नु उपयुक्त हुनेमा जोड दिएका छन्।