यस्तो छ केपी ओलीले पार्टी एकताका लागि राखेको नयाँ प्रस्ताव

काठमाडौं– सत्तारुढ एमाले अध्यक्ष केपी शर्मा ओलीले पार्टी एकताका लागि नयाँ प्रस्ताव राखेका छन्। उनले आइतबार साँझ एमाले एकताका लागि भन्दै यस्तो प्रस्ताव आह्वान गरेका हुन्।  

उनले भनेका छन्, ‘एमाले लाई २०७५ साल जेठ ३ गते पूर्वको अवस्थाबाट अगाडि बढाइनेछ।’  यस्तै नेकपा को केन्द्रीय कमिटीका सदस्यहरुमध्ये एकताको पक्षमा उभिएका नेताहरुलाई आधार मानेर केन्द्रीय कमिटी र स्थायी कमिटीका संरचना गतिशील हुने प्रस्ताव गरेका छन्।

ओलीले मातहतका पार्टी कमिटी र जनसंगठनहरु मूलभूत रुपमा २०७५ जेठ ३ पूर्वको अवस्थामा फर्केर क्रियाशील हुने प्रस्ताव गरेका छन्। उनले भनेका छन्, ‘संगठनात्मक क्षेत्रका यी निष्कर्षहरु कार्यान्वयन गर्ने क्रममा देखा पर्ने समस्या समाधानका लागि कार्यदलले काम गर्नेछ।’

यसैगरी पार्टीका अध्यक्षलाई प्रधानमन्त्री पदबाट हटाई विपक्षी दलका नेतालाई प्रधानमन्त्री बनाइयोस् भन्ने मागसहित सर्वोच्च अदालतमा प्रस्तुत रिट निवेदनमा प्रयोग गरिएको नेकपा एमाले का निवर्तमान सांसदहरुको हस्ताक्षर फिर्ता हुने प्रसताव पनि उनको छ। 

ओलीले यस बीचमा विभिन्न नेताहरुबाट भएका गल्ती तथा कमीकमजोरीलाई लिएर कुनै कार्बाही नगरिने प्रतिबद्धता जनाएका छन्। यस्तै कसैमाथि पूर्वाग्रह नराखिने र भेदभाव नगरिने प्रतिबद्धता उनको छ। ओलीले भनेका छन्, ‘एमालेलाई वैचारिक, सङ्गठनात्मक र भावनात्मक रुपले एकतावद्ध, अनुशासित र अझ सुदृढ बनाउन सबै कमरेडहरुले रचनात्मक योगदान गर्नु हुनेछ।’