पुनर्गठित संवैधानिक इजलासप्रति सरकारी पक्षको आपत्ति

काठमाडौं- प्रतिनिधिसभा विघटनविरुद्धको मुद्दा सुनुवाइका लागि आइतबार गठित संवैधानिक इजलास गठनको विषयलाई लिएर सरकारी पक्षले आपत्ति जनाएको छ।

महान्यायाधिवक्ता रमेश बडालले यसअघि गठन भएको इजलासमा रहेका न्यायाधीशहरूलाई किन हटाइएको भन्दै कडा आपत्ति जनाएका हुन्। उनले न्याय दुवै पक्षलाई समान हुनुपर्ने भन्दै इजलासले प्रश्न उठेपछि त्यसबारेमा ध्यान दिनुपर्ने बताए।

‘पूर्वाग्रहको आशंका भए पुग्छ भनेर आनन्दमोहन श्रीमानले नै लेख्नुभएको छ। हामीलाई यो इजलासमा आशंका छ,’ उनले भने,‘विष्णुको आसनमा प्रश्न लिएर उभिएपछि भगवानले पनि विचार गर्नुपर्छ।’  

अधिवक्ताहरू राजाराम घिमिरे, कृष्णप्रसाद भण्डारी, दीपक मिश्र र यज्ञमणि न्यौपानेले संवैधानिक इजलासको रोस्टरमा रहेका ११ जना न्यायाधीशहरूले अहिलेको मुद्दा सुनुवाइ गर्न नमिल्ने भन्दै निवेदन दिएका हुन्।

बहस अहिलेसम्म विषयवस्तुमा प्रवेश गर्न सकेको छैन।