राउटे युवतीहरूमाथि यौन दुर्व्यवहार, तीन जना पक्राउ

सुर्खेत - लोपोन्मुख राउटे समुदायका युवतीमाथि यौन दुर्व्यवहार भएको छ। गुर्भाकोट नगरपालिका-९, बोटेचौरका तीन युवाहरूले दुई जना राउटे युवतीमाथि यौन दुर्व्यवहार गरेका हुन्।

२९ वर्षीय विनोद पुन, ३५ वर्षीय दोमनबहादुर घर्ती र २४ वर्षीय भूपेन्द्र बुढाले राउटे युवतीमाथि यौन दुर्व्यवहार गरेकाे प्रहरीले जनाएकाे छ। 

उनीहरूले युवतीहरूलाई होटलमा लगेर मदिरा खुवाएर यौन दुर्व्यवहार गरेकाे जिल्ला प्रहरी कार्यालय सुर्खेतले जनाएको छ।

युवतीहरूलाई यौन दुर्व्यवहार गरेको भिडियो सार्वजनिक भएपछि तीनजनालाई आज (आइतबार) बिहान प्रहरीले पक्राउ गरेको छ।

घटनाको विषयमा थप अनुसन्धान भइरहेको सुर्खेतका डीएसपी रामप्रसाद घर्तीमगरले जानकारी दिए। 

भिडियोमा पुरुषहरू अर्धनग्न अवस्था देखिन्छन्। उनीहरूले युवतीहरूलाई यौन दुर्व्यवहार गरेको देखिन्छ।

फिरन्ते राउटे समुदाय गुर्भाकोट नगरपालिका-११, आँपसोतीको भेरी किनारमा बस्दै आएका छन्।