फेसबुकमार्फत् स्वास्थ्यकर्मीको चरित्रहत्या गरेको आरोपमा एक जना पक्राउ

पर्सा- फेसबुकमार्फत् स्वास्थ्यकर्मीको चरित्रहत्या गर्ने तथा सार्वजनिक हित, स्वास्थ्य, सुरक्षा, सुविधा र नैतिकताविरुद्धको कसूर गरेको अभियोगमा एक जना पक्राउ परेका छन्। पक्राउ पर्नेमा वीरगंज महानगरपालिका-१० घडिअर्वा बस्ने २४ वर्षीय सौरभ साह छन्। उनलाई मंगलबार पक्राउ गरिएको प्रहरीले जानकारी दिएको छ। 

वीरगञ्ज नगरक्षेत्रमा रहेका विभिन्न अस्पताल, कार्यरत चिकित्सक तथा स्वास्थ्यकर्मीहरूमाथि आफ्नो फेसबुक पेज तथा फेसबुक मेसेन्जर समेतबाट पटक-पटक आपत्तिजनक शब्दहरूको प्रयोग गरी विभिन्न आरोप लगाई व्यक्तिको चरित्रहत्या गर्ने, धम्क्याउने लगायतका क्रियाकलाप गरेको भन्ने जाहेरीको आधारमा खटिएको प्रहरीले उनलाई पक्राउ गरिएको प्रहरीको भनाइ छ। 

उनीमाथि मुलुकी अपराध संहिता, २०७४ अन्तर्गत सार्वजनिक हित, स्वास्थ्य, सुरक्षा, सुविधा र नैतिकताबिरूद्धको कसूरमा ५ दिन म्याद थप गरी आवश्यक अनुसन्धान भइरहेको  जिल्ला प्रहरी कार्यालय पर्साले उल्लेख गरेको छ।