तिलोत्तमामा समुदायस्तरमा कोरोनाको निःशुल्क परीक्षण  

बुटवल - रूपन्देहीको तिलोत्तमा नगरपालिकाले कोरोना संक्रमणको चेन ब्रेक (सर्ने प्रक्रिया रोक्न) गर्न कोरोना परीक्षणलाई समुदायस्तरमा केन्द्रित गरेको छ।

महामारी सुरु भएसँगै शंकरनगरमा मात्र गरिएको निःशुल्क कोरोना परीक्षणलाई  पछिल्ला दिनमा समुदायस्तरसम्म पुर्‍याइएको नगरपालिकाले जनाएको छ।

नगर प्रमुख वासुदेव घिमिरेले समुदायस्तरमा निःशुल्क कोरोना परीक्षण सुरु भएकोले कन्ट्रयाक्ट ट्रेसिङमा परेका वा कोभिड-१९ को लक्षणसँग मिल्दाजुल्दा स्वास्थ्य समस्या भएका नगरवासीलाई पायक पर्ने परीक्षण स्थलमा गई कोरोना परीक्षण गराउन अनुरोध गरेका छन्। नगरपालिकाले दुईवटा समूह बनाएर १७ वडामै एन्टिजेन परीक्षणको व्यवस्था मिलाएको हो।

तिलोत्तमा नगरपालिकाको पछिल्लो तथ्यांकअनुसार नगरपालिकामा हाल सक्रिय संक्रमितको संख्या ४७५ छ। नगरपालिकामा हालसम्म पाँच हजार ८३६ जनालाई कोरोना संक्रमण भएकोमा पाँच हजार २१६ जना संक्रमणमुक्त भएको नगरपालिकाको स्वास्थ्य शाखाले जनाएको छ।