निषेधादेशको समयमा झण्डै सात हजारले लिए श्रम स्वीकृति

काठमाडौं– काठमाडौं उपत्यकामा निषेधादेश जारी भएको एक महिनाको अवधिमा लगभग सात हजार जनाले वैदेशिक रोजगारीमा जानका लागि श्रम स्वीकृति लिएका छन्।

वैदेशिक रोजगार कार्यालय ताहाचलबाट गएको वैशाख १६ यता ६ हजार ८८८ जनालाई श्रम स्वीकृति प्रदान गरिएको वैदेशिक रोजगार कार्यालयले जनाएको छ। कोरोना महामारी रोकथामका लागि सरकारले गएको वैशाख १६ गतेदेखि काठमाडौं उपत्यकामा निषेधादेश जारी गरेको थियो। २३ गते मध्य रातिदेखि अन्तर्राष्ट्रिय उडान पनि बन्द गरेको थियो।

श्रम कार्यालयले अहिले भौतिक रूपमा उपस्थित भएर प्रदान गर्ने अन्तिम श्रम स्वीकृति, नयाँ श्रम स्वीकृति लगायत सेवा बन्द गरेको छ। तर अनलाइनमार्फत प्रदान हुने पुनः श्रम स्वीकृति भने लिन सकिन्छ।

पछिल्लो समय वैदेशिक रोजगार कल्याणकारी कोषमा र बिमाबापत तिर्नुपर्ने रकम अनलाइनमार्फत नै तिर्ने व्यवस्था गरेपछि वैदेशिक रोजगार कार्यालयमा नगई अनलाइनमार्फत नै विदेशबाट पनि पुनः श्रम स्वीकृति लिन सकिने व्यवस्था भएको छ।