उद्घाटन खेलमा रुस र साउदी : कसले देला चक्मा ?

काठमाडौं- फुटबल प्रेमीहरूको प्रतीक्षाको घडी अबको केही घण्टामा सकिँदैछ । संसारकै सर्वाधिक महँगो खेलकुद प्रतियोगितामा सहभागी हुन ३२ देशका खेलाडीहरू रुस पुगिसकेका छन् । 

चार वर्षदेखिको प्रतीक्षापछि जब विश्वकप २०१८ को उद्घाटन खेल नेपाली समयअनुसार साँझ पौने नौ बजे शुरु हुन्छ, सबैले लामो सास तान्नेछन् । 

त्यसपछि शुरु हुनेछ अबको खेल कसले जित्छ, कुन खेलाडीले कस्तो प्रदर्शन गर्छ भन्ने विश्लेषण । फुटबल प्रेमीहरूबीच आ–आफूले समर्थन गरेको टिम तथा खेलाडीको पक्षमा वकालत मात्र होइन, अनुमानका आधारमा विजयी हुने दाबा शुरु हुनेछ । 

रुसको राजधानी मस्कोस्थित लुज्निकी स्टेडियममा हुने उद्घाटनका खेलका लागि दुवै टिमका खेलाडी तथा प्रशंसकहरू जम्मा भइसकेका छन् । 

दुवै टिमका खेलाडीको धड्कन पक्कै बढेको छ । ‘फस्ट इम्प्रेसन इज लास्ट इम्प्रेसन’ भनेझैं पहिलो खेलमा विश्वकपको मजा दिनुपर्ने चुनौतीमा छन्, रुस र साउदी अरेबिया । 

समूह ‘ए’को पुछारमा रहेका टिम हुन्, दुवै । आयोजक राष्ट्र भएकाले रुस स्वतः विश्वकप छनोटमा परेको हो भने साउदीले छनोट चरण पार गरेर आएको हो ।

आयोजक रुसलाई गृहमैदानको पहिलो खेल जित्नैपर्ने दबाब छ । रुसी खेलाडीलाई गृहमैदान भएकाले समर्थकहरूको पनि ठूलो साथ रहनेछ । त्यसबाट खेलाडीहरूलाई राहत मिल्ने अनुमान छ । 

यी दुवै टिम यसअघि सन् १९९३ को मैत्रिपूर्ण खेलमा एक पटक मात्रै आमनेसामने भएका थिए । त्यस खेलमा साउदीले रुसलाई ४–२ ले पराजित गरेको थियो । 

तर, साउदीका प्रशिक्षक जउन एन्टोनियो पिजीले गृहमैदानमै रुसका समर्थकहरूको मुख बन्द गराउने बताए । उनले भने, ‘हामी रुसका समर्थहरूलाई मुख खोल्ने मौका पनि दिने छैनौं ।’

आफ्नो उद्देश्य रुसलाई जसरी पनि पछार्ने रहेको उनले बताए । पिजीले थपे, ‘हामी गृहमैदान भन्दैमा त्रसित भएका छैनौं ।’

रुस फिफा र्‍यांकिङमा आफ्नो विपक्षी साउदी अरेबियाभन्दा तीन स्थान तल अर्थात् ७०औं स्थानमा छ । सन् २००६ पछि साउदी अरेबिया कुनै पनि विश्वकपमा सहभागिताका लागि योग्य भएन । 

तर, १२ वर्षपछि विश्वकपमा फर्किएको साउदीले खेल जित्ने निश्चित भएको दाबी गरेको छ । प्रशिक्षक पिजीले आफ्ना खेलाडीहरूले शुरुवाती खेल सजिलै हात पार्ने दाबी दोर्‍याए । उनले भने, ‘हामीले रुसका लागि खलनायक बन्ने रणनीति र रुसलाई आफ्नो शाख बचाउन मुस्किल हुने स्थितिमा पुर्‍याउने छौं ।’

'जीवनको सर्वाधिक ठूलो अवसर'

रुसी मिडफिल्डर अलेक्जेन्डर समिडोभले टुर्नामेन्टको उद्घाटन खेललाई ‘सर्वाधिक ठूलो अवसर’ संज्ञा दिएका छन् । सन् १९९८ देखि आयोजक राष्ट्रले खेल गुमाएका छन् । तर, यसपटक आयोजकले नै ट्रफी जित्ने लक्ष्यमा आफूहरू उत्रिने समिडोभको दाबी छ ।

‘हामी सम्पुर्ण रूपमा तयार छौं । बिहीबार हुने उद्घाटन खेल मेरा लागि जीवनकै सबैभन्दा ठूलो प्रतिस्पर्धा हो । यसमा जित्नेबाहेक अरू केही सोचेका छैनौं,’ रुसी खेलाडी स्पर्टकले भने, ‘हामीलाई विपक्षीलाई कसरी पराजित गर्नुपर्छ भन्ने हरेक रणनीति थाहा छ ।’

आयोजक रुस विश्वकपमा कमजोर ठानिएको छ । डिफेन्डर दिमित्री कोम्बरोभ र भिक्टोर भसिन दुवैले यस वर्षको विश्वकप गुमाएका छन् । उनीहरू दुवै रुसका लागि महत्वपूर्ण मानिएका थिए । यसकारण रुसले मध्यतिर तीन र पछाडि चार जनाको ढाँचामा मैदानमा उत्रिने रणनीति लिएको छ । 

रुसको डिफेन्सका लागि ३८ वर्षीय सेर्गेयी इगन्सेहिभिचलाई अगाडि सारिएको छ । दायाँतर्फबाट अघिल्तिर स्मोलनिकोभ र मारियो फर्नान्डेज रहनेछन् । बायाँतर्फबाट अघिल्तिर चेल्सीका पूर्वखेलाडी यूरी जिर्कोभ ल्याउने तयारी गरेको छ । 

साउदी अरेबिया भने स्टार खेलाडविहीन मैदानमा उत्रिनेछ । साउदीले पनि स्टार नवाफ अल अबेदले चोटका कारण विश्वकपलाई अवलोकन मात्रै गर्नेछन् । नवाफ साउदीका टप खेलाडी मानिन्छन् । 

खेलको मध्यपछि सलिम अल दावसरी र फहद अल मुल्लावादलाई मैदानमा देख्न सकिनेछ । क्याप्टेन ओसामा हवास्मी र तैसिर अल जसिमको सहकार्यलाई महत्वपूर्ण रूपमा हेरिएको छ । यो जोडीले अन्तर्राष्ट्रिय खेलबाट दुई सय ६७ ‘क्याप’ प्राप्त गरेका छन् । 

रुस ६० वर्षअघि अर्थात् सन् १९५८ देखि विश्वकपमा सहभागी हुन थालेको हो । साउदी अरेबियाले २४ वर्षअघि (सन् १९९४मा) विश्वकपमा प्रवेश पाएको हो । दुवै मुलुक यसअघिका विश्वकप विजेता या उपविजेता होइनन् । 

रुसको विश्वकप यात्रा त्यति लोभलाग्दो छैन । सन् १९६६ मा चौथो स्थानको उपाधि नै रुसका लागि सबैभन्दा ठूलो जित हो । र, साउदी पनि धेरै पछि विश्वकपमा सहभागी भएर पछिल्लै लहरमा उभिएको टिम हो । 

रुसको शुरुवाती लाइन अप ३–४–२–१


साउदीको शुरुवाती लाइन अप ४–२–३–१