काठमाडौं– संवैधानिक इजलास सञ्चालन सम्बन्धी नियमावली संशोधन गरेर संवैधानिक इजलास गठन गर्ने सहमति भएको छ। सर्वोच्च अदालतको फुल कोर्ट बैठकले स्वीकृत गरेर न्याय परिषद्बाट पारित गर्ने गरी प्रधानन्यायाधीश र सर्वोच्च बारका पदाधिकारीबीच सहमति भएको बारका अध्यक्ष पूर्णमान शाक्यले जानकारी दिए।
शाक्यले भने, ‘अब मर्यादाक्रमअनुसार नै संवैधानिक इजलास गठन गर्ने र त्यहाँ रहेका न्यायाधीश कारणबस सहभागी हुन नसक्ने स्थिति भएमा जानकारी दिएर त्यसपछिका न्यायाधीश इजलासमा रहने सहमति भएको छ।’ इजलास गठनमा देखिएको विवाद समाधानका लागि मंगलबार प्रधानन्यायाधीश र बारका पदाधिकारीबीच छलफल भएको थियो।
एक साताभित्रमा नियमावली संशोधन गरेर त्यसपछि मात्रै संवैधानिक इजलास गठन हुने अध्यक्ष शाक्यले जानकारी दिए।
इजलासमा रहेका न्यायाधीशद्वय तेजबहादुर केसी र बमकुमार श्रेष्ठको नैतिकताका बारेमा कानुन व्यवसायीले प्रश्न उठाएपछि संसद् विघटनसम्बन्धी मुद्दा सुनुवाइ प्रक्रिया अघि बढ्न सकेको छैन।
गत शुक्रबार सुरु भएको सुनुवाइ आइतबार पनि न्यायाधीशकै नैतिकताका बारेमा न्यायाधीश र कानुन व्यवसायी बीच सबालजबाफ भएको थियो। दुई न्यायाधीशले भने आफूहरु नहट्ने बताइसकेका छन्।
प्रकाशित: Jun 01, 2021| 06:23 मंगलबार, जेठ १८, २०७८
