काठमाडौं- विवेकशील साझा पार्टीका संयोजक मिलन पाण्डले पार्टीका नेता उज्जवल थापाको स्वास्थ्य अवस्था अत्यन्त जटिल रहेको जानकारी दिएका छन्। सोमबार बेलुका ५:४५ बजेसम्म उनको स्वास्थ्य अवस्थामा सुधार नआएको उनले जानकारी दिएका हुन्।
'उहाँको स्वास्थ्योपचार भेन्टिलेटर र एक्मो विधिबाट जारी छ,' ट्विटमा उनले लेखेका छन्, 'अत्यन्त जटिल स्थितिमा पनि चिकित्सकहरु हरसम्भव प्रयासमा छन्।'
मेडिसिटी अस्पतालमा उनको उपचार भइरहेको छ। भेन्टिलेटरमा राखी इक्मो विधिबाट उपचार जारी रहेको संयोजक पाण्डेले बताए।
सोमबारै उनको कोरोना रिपोर्ट नेगेटिभ आएको छ। कोरोना संक्रमणपछि स्वास्थ्य स्थिति जटिल बन्दै गएपछि उनलाई अस्पताल भर्ना गरिएको थियो। यसअघि ग्रान्डी अस्पतालमा उपचाररत उनलाई एक्मो विधिबाट उपचार गर्न मेडिसिटी भर्ना गरिएको हो।
प्रकाशित: May 31, 2021| 13:38 सोमबार, जेठ १७, २०७८
