काठमाडौं- नेपाल युथ फाउन्डेसनले ललितपुर महानगरपालिका र पाटन अस्पतालसँगको सहकार्यमा सुनाकाेठीमा ५० बेड क्षमताको अक्सिजनसहितको आइसोलेसन सेन्टर सञ्चालन गरेको छ।
कोरोना संक्रमण भएर घरमै बसिरहेका, सुरक्षित आइसोलेसनको व्यवस्था नभएका र अस्पतालको सघन उपचारपछि सुधारोन्मुख अवस्थामा रहेका बिरामीका लागि आइसोलेसन सेन्टर सञ्चालनमा ल्याइएको हो।
आइसोलेसन सेन्टर हेरिरहेका डा. छविन्द्र गैरेले अस्पतालमा बेड र अक्सिजनको अभाव भइरहेको अवस्था र घरमै बसिरहेका संक्रमितहरुलाई मध्यनजर गर्दै आइसोलेसन सेन्टर स्थापना गरिएको बताए।
‘घरमा भएका र अस्पतालको सघन उपचार कक्षबाट फर्किएका संक्रमितको स्वास्थ्यलाई मध्यनजर गर्दै आइसोलेसन सेन्टर सञ्चालनमा ल्याएका हौं’, डा. गैरेले नेपाल समयसँग भने, ‘हामीले आइसोलेसन सेन्टरभन्दा पनि उपचार कक्षको रुपमा काम गरिरहेका छौं।’
आइसोलेसन सेन्टरसँग एम्बुलेन्स सेवा तथा चिकित्सकसहित स्वास्थ्यकर्मी २४सै घण्टा उपलब्ध रहेको उनले बताए।
सेन्टरमा दुईवटा एचडीयूसहित ५० शय्या छन्।
‘हामीले सेवा सुविधा भएको गुणस्तरयुक्त आइससोलेसन सेन्टर स्थापना गरेका हौं’, डा. गैरेले भने, ‘कोभिड–१९ का लागि स्थापना गरिएको भए पनि सम्पूर्ण बिरामीलाई इमर्जेन्सीका लागि चाहिने औषधिको व्यवस्था गरेका छौं।’
उनका अनुसार आइसोलेसन सेन्टरमा अहिलेसम्म १२१ जना बिरामी आएका छन्। जसमध्ये ७५ जना निको भई घर फर्किसकेका छन्।
जस्तोसुकै बिरामी आए पनि उपचार गर्ने क्षमता रहेको भन्दै गैरेले आफ्नै एम्बुलेन्समा बिरामीलाई अस्पताल पुर्याउनसमेत काम गरिरहेको जानकारी दिए।
