उज्वलको स्वास्थ्यलाभको कामना गर्दै गगनले लेखे यस्तो ट्विट

काठमाडौं– नेपाली कांग्रेसका नेता तथा सांसद गगनकुमार थापाले विवेकशील नेपाली दलका पूर्वसंयोजक उज्वल थापाको स्वास्थ्य लाभको कामना गर्दै ट्विट गरेका छन्।

नेपाल मेडिसिटी अस्पतालमा उपचाररत थापाको स्वास्थ्य लाभको कामना गर्दै गगनले भनेका छन्, ‘प्रिय उज्वल, तिम्रो परिवारसँगै, हामी साथी र शुभेच्छुक पनि तिम्रो शीघ्र स्वास्थ्य लाभको कामना गरिरहेका छौँ। हामीलाई विश्वास छ, तिमी छिट्टै कोरोनालाई जितेर हाम्रो माझमा आउनेछौ।’  

यसैबीच, उपप्रधानमन्त्री ईश्वर पोखरेलले पनि मेडिसिटी अस्पतालका चिकित्सकलाई फोन गरी नेता थापाको स्वास्थ्य अवस्थाबारे जानकारी लिएका छन्।

कोरोना भाइरसको संक्रमण भएर अस्पतालमा उपचाररत थापाको स्वास्थ्य अवस्था थप जटिल बन्दै गएको छ।

उपचारमा संलग्न चिकित्सकका अनुसार थापाको स्वास्थ्य अवस्थामा सुधार आउन नसकेको उनको परिवारका तर्फबाट जारी प्रेस नोटमा उल्लेख छ। अहिले थापाको उपचार मेडिसिटी अस्पतालमा भइरहेको छ। यसअघि उनको ह्याम्स र ग्रान्डी अस्पतालमा उपचार भएको थियो। अवस्था सुधार नभएपछि उनलाई मेडिसिटीमा भर्ना गरिएको थियो।

‘अहिले अस्पतालमा ईसीएमओ प्रविधिबाट विशेषज्ञहरुबाट, अस्पताल भन्दा बाहिरका विशेषज्ञहरूको राय सल्लाहलाई समेत मध्यनजर गर्दै उपचार भइरहेको भए तापनि उज्वलको अवस्था जटिल हुँदै गएको छ। उहाँको उपचारको क्रममा उपलब्ध सबै विधिहरूको प्रयोग गरेको उपचारमा संलग्न चिकित्सकहरुले जानकारी गराउनु भएको छ,’ आइतबार दिउँसो परिवारका तर्फबाट जारी प्रेस नोटमा उल्लेख छ।