गणतन्त्र दिवसमा वामदेव गौतमको सन्देश– महानायक गिरिजा, प्रचण्ड र माधव नेपाल हुन्

काठमाडौं– नेकपा (एमाले) का नेता वामदेव गौतमले युगान्तकारी संघर्षका महानायक नेपाली कांग्रेसका तत्कालीन सभापति गिरिजाप्रसाद कोइराला, माओवादी केन्द्रका अध्यक्ष पुष्पकमल दाहाल‘ प्रचण्ड’ र नेकपा एमालेका तत्कालीन महासचिव माधवकुमार नेपाल भएको बताएका छन्।

१४ औं गणतन्त्र दिवसको अवसरमा शनिबार शुभकामना व्यक्त गर्दै नेता गौतमले भनेका छन्,  ‘नेपालमा राजतन्त्रको अन्त्य गर्दै गणतन्त्र घोषणाको पृष्ठभूमिमा हजारौँ नेताकार्यकर्ता तथा अन्य नेपाली जनताको सहादत, त्याग तपस्या र समर्पण रहेको सर्वविदितै छ। तर, २०६५ जेठ १५ गतेको अवस्थामा नेपाललाई ल्याईपुर्‍याउने युगान्तकारी संघर्षका महानायकहरू भने नेपाली कांग्रेस पार्टीका सभापति गिरिजाप्रसाद कोइराला, नेकपा एमालेका महासचिव माधवकुमार नेपाल र नेकपा माओवादीका अध्यक्ष पुष्पकमल दाहाल प्रचण्ड हुनुहुन्थ्यो। उहाँहरूमध्ये गिरिजाप्रसाद कोइराला हामीबीच हुनुहुन्न। अरू दुईजना भने नेपाली राजनीतिमा सक्रिय नै हुनुहुन्छ।’

नेता गौतमले एमाले केन्द्रीय कमिटीको बहुमतले तत्कालीन संघर्षको मुख्य नारा राजतन्त्रको अन्त्य र गणतन्त्र स्थापना तय गर्दा चर्चित झापा संघर्षका तीन नेता त्यसको विरुद्धमा रहेको खुलासा गरेका छन्। तर ती तीन नेता को हुन् भन्नेचाहिँ गौतमले खुलाएका छैनन्।

विभिन्न पार्टीमा आवद्ध तीन नेता गणतन्त्रको विपक्षमा रहेको बताउँदै नेता गौतमले संघर्षको मुख्य नारा गणतन्त्रको स्थापना हुनुपर्छ भनेर बैठकमा लिखित प्रस्ताव राख्ने व्यक्ति आफू भएको दाबी गरेका छन्।