सुर्खेतमा पनि एमालेको समानान्तर कमिटी

सुर्खेत - नेकपा (एमाले) माधव–झलनाथ पक्षले सुर्खेतमा पनि समानान्तर कमिटी गठन गरेको छ। मोहनसिंह बडुवालको अध्यक्षतामा २२७ सदस्यीय जिल्ला कमिटी गठन गरिएको हो।

कमिटीको उपाध्यक्षमा टोपबहादुर रास्कोटी, सचिवमा शिवप्रसाद उपाध्याय र उपसचिवमा बलबहादुर नेपाली छन्। बडुवाल यसअघि एमालेका सचिव थिए भने रास्कोटी यसअघि उपसचिव थिए। त्यस्तै सचिव उपाध्याय पनि अघिल्लो कार्यकालमा उपाध्यक्ष भइसकेका हुन्।

उनी २०७० सालको दोस्रो संविधान सभा निर्वाचनमा सुर्खेत क्षेत्र नं. २ बाट हालका एमाले प्रदेश कमिटी संयोजक एवम् कर्णाली प्रदेशसभा संसदीय दलका नेता यामलाल कँडेलविरुद्ध बागी उम्मेद्वार बनेका थिए। उक्त निर्वाचनमा कांग्रेस विजयी भएको थियो। 

लामो समयदेखि माधव–झलनाथ समूहलाई साथ दिँदै आएका एमाले सुर्खेतका अध्यक्ष एवम् प्रतिनिधिसभा सदस्य ध्रुवकुमार शाही संस्थापन पक्षमा लागेपछि सो पक्षले शुक्रबार साँझ समानान्तर कमिटी घोषणा गरेको हो।