आइतबारका लागि 'हेर्दाहेर्दै'मा प्रतिनिधि सभा विघटनविरुद्धका मुद्दा

काठमाडौं-  प्रतिनिधिसभा विघटनविरूद्ध परेको रिट 'हेर्दाहेर्दै'मा राखिएको छ। प्रधानन्यायाधीश चोलेन्द्र शमशेर राणासहित ५ जनाको संवैधानिक इजलासले रिटहरूलाई आइतबारकार लागि 'हेर्दाहेर्दैमा राखेको हो।

प्रधानन्यायाधीश राणाले विघटनविरुद्धका परेका १९ रिटलाई बिहीबार संवैधानिक इजलासमा पठाउने आदेश गरेका थिए। यसपछि शुक्रबार संवैधानिक इजलासा ती रिटमाथि सुनुवाइ सुरु भएको हो। 

संवैधानिक इजलासमा प्रधानन्यायाधीशसहित ५ जना न्यायाधीश हुने व्यवस्था छ। 

राष्ट्रपति विद्यादेवी भण्डारीले जेठ ८ गते राती पौने २ बजेतिर प्रतिनिधिसभा विघटन गरेकी थिइन्। बहुमत सदस्यका साथ दाबी पेस गरेपनि प्रधानमन्त्रीमा शेरबहादुर देउवालाई नियुक्त नगरी संसद् नै विघटन गरेको भन्दै सत्तारुढ एमालेको नेपाल पक्ष, जसपाको उपेन्द्र-बाबुराम पक्ष, माओवादी केन्द्र र नेपाली कांग्रेसका १ सय ४६ जना सांसदले सर्वोच्च अदातलमा रिट दर्ता गराएका थिए।

यसअघि पनि प्रधानमन्त्री ओलीले गत पुस ५ गते संसद् विघटन गरेका थिए। सर्वोच्चले उक्त विघटन अवैधानिक भएको ठहर गरेको थियो।