हप्ता–दश दिनभित्र खोपको विषयमा ब्रेकथ्रु हुन सक्छ : परराष्ट्रमन्त्री ज्ञवाली

काठमाडौं– परराष्ट्रमन्त्री प्रदीप ज्ञवालीले अबको साता– दश दिनभित्र खोपको विषयमा ब्रेकथ्रु हुन सक्ने बताएका छन्। 

स्वास्थ्य पत्रकार मञ्च नेपालले आयोजना गरेको भर्चुअल पत्रकार सम्मेलनमा मन्त्री ज्ञवालीले विभिन्न देशसँग खोपका लागि पहल भइरहेकाले केही दिनमै सकारात्मक सन्देश आउने बताएका हुन्।  

‘नेपालले खोपका लागि पहल गरेका केही देशहरुले अबको दश दिनभित्र खोप दिने विषयमा घोषणा गर्न सक्नेछन्,’ मन्त्री ज्ञवालीले भने, ‘हामीले रुस, बेलायत, चीन र अमेरिकालाई औपचारिक पत्र पठाई खोप खरिदका लागि पहल गरेकाले ती देशले सकारात्मक सन्देश दिने विश्वास हाम्रो छ।’ विशेषगरी चीन र अमेरिका बढी सकारात्मक रहेको उनले जानकारी दिए। 
मन्त्री ज्ञवालीका अनुसार पहिलो डोज कोभिसिल्ड खोप लगाएका तर दोस्रो डोजका लािग पर्खाइमा रहेका १३ लाखभन्दा धेरैलाई कोभिसिल्ड नै दिन पहल भइरहेको छ।

मन्त्री ज्ञवालीले भने, ‘अहिले अमेरिकासँग ६ करोड डोज कोभिसिल्ड भएको जानकारी आएपछि हामीले त्यसको लागि पहल गरेका छौं। अमेरिकाले मोडेर्ना, फाइजर लगायत खोप लगाएकाले त्यहाँ एस्ट्राजेनेकाको खोप प्रयोग भएको छैन। त्यसैले हामीले त्यहाँको खोप उपलब्ध गराउन भनेको छौं। प्रकृया लामो भएकाले केही समय लाग्ने देखिएको छ। तर नेपाल प्राथमिकतामा राखेकाले हामी आशाबादी छौं।’