भेरी अस्पताल प्रकरणका दोषीलाई हदैसम्मको कारबाही हुन्छ : प्रहरी

काठमाडौं - बिहीबार राति भेरी अस्पतालका चिकित्सकमाथि आक्रमण गरेको आरोपमा प्रहरीले तीन जनालाई पक्राउ गरेको छ। बाँके प्रहरी प्रवक्ता (डिएसपी) सुवास खड्काले बिहीबार राति नै तीन जनालाई पक्राउ गरिएको बताए।

घटनामा संलग्न रहेको आरोपमा तुलसीपुर उपमहानगरपालिका वडा नम्बर ११ उरहरीका मानबहादुर रावत, भरत रावत र लोकराज रावतलाई पक्राउ गरिएको उनले बताए। उनीहरूमध्ये मानबहादुर मृतकका भाइ हुन् भने बाँकी २ जना मृतकका छोरा हुन्।

अस्पतालमा कोरोना संक्रमित बिरामीको मृत्यु भएपछि आफन्तहरूले चिकित्सक र स्वास्थ्यकर्मीमाथि आक्रमण गरेका छन्। गएराति आईसीयूमा उपचारत बिरामीको मृत्यु भएपछि बिरामी कुरुवा आफन्तले उपचारमा खटिएका चिकित्सक र स्वास्थ्यकर्मीहरूलार्ई आक्रमण गरेका हुन्। 

दोस्रो तल्लाको ब्लक ए को आईसीयू कक्षमा बिरामीको मृत्युलगत्तै बिरामीका आफन्त आक्रोशित हुँदै त्यहाँ उपचार गराइरहेका चिकित्सक र नर्सलाई आक्रमण गरेर लेखट्न थालेको अस्पतालका सूचना अधिकारी डा. संकेतकुमार रिसालले बताए। 

आफन्तमाथि आक्रमण भएपछि अहिले स्वास्थ्यकर्मीहरू आन्दोलनमा छन्।