काठमाडौं - नेकपा एमालेका लुम्बिनी प्रदेश कमिटी अध्यक्ष लीला गिरीले भेरी अस्पतालमा स्वास्थ्यकर्मीमाथि आक्रमण गर्ने लोकराज रावतलाई कारबाही गर्न माग गरेका छन्।
नेपाल समयसँग कुरा गर्दै उनले रावतलाई एमाले लुम्बिनी प्रदेश कमिटी सदस्य भनेर अफवाह फैलाइएको बताउँदै कानुनी दायरामा ल्याउन आग्रह गरे। 'उहाँ मेरो नेतृत्वको प्रदेश कमिटीमा हुनुहुन्न। दोषिलाई कारबाही हुनुपर्छ', उनले भने।
उनी अपराधी कुनै दलको नहुने भएकाले कानुनी कारबाही गर्न आग्रह गर्छन्। एमालेसँग नाम ओडेर अफवाह फैलाएको भन्दै उनले आपत्ति जनाए।
'हामी सरकारमा रहेको दलका मानिस हौं। अपराधीलाई कारबाही गर्न हाम्रो पूर्ण सहयोग हुन्छ। राजनीतिक पहुँच भएकोले प्रहरीले उनलाई छाड्न सक्ने भन्दै विभिन्न कुरा आइरहेका छन्। त्यस्तो हुँदैन', उनले भने।
प्रकाशित: May 28, 2021| 05:26 शुक्रबार, जेठ १४, २०७८
