कोभिड अध्यादेश आएपछि आईसीएस निष्क्रिय 

काठमाडौं– स्वास्थ्य तथा जनसंख्या मन्त्रालयको इन्सिडेन्ट कमान्ड सिस्टम (आईसीएस) निष्क्रिय भएको छ। कोभिड–१९ संकट व्यवस्थापन अध्यादेश, २०७८ जारी भएसँगै कोभिड–१९ उपचार र नियन्त्रणका लागि बनाएको आईसीएस निष्क्रिय भएको हो। 

आईसीएसले गर्दै आएका कामहरु केही कोभिड–१९ संकट व्यवस्थापन केन्द्र र कोभिड–१९ युनिफाइड केन्दीय अस्पतालले गर्ने भएपछि निष्क्रिय बनाइएको मन्त्रालयका सह–प्रवक्ता डा. समिर कुमार अधिकारीले जानकारी दिए।

अध्यादेश जारी भएपछि आईसीएसले गर्ने काम युनिफाइड केन्द्रीय अस्पताल र कोभिड–१९ संकट व्यवस्थापन केन्द्रको अधिकार क्षेत्रमा परेको छ। आईसीएसले हालसम्म कोभिड–१९को उपचार र व्यवस्थापनलगायतका कार्यहरु गर्दै आएको थियो। सहप्रवक्ता डा. अधिकारीले भने, ‘अहिले धेरैजसो कामहरु कोभिड–१९ संकट व्यवस्थापन केन्द्र र युनिफाइड केन्द्रीय अस्पतालले गर्ने व्यवस्था अध्यादेशमा छ।’

अध्यादेशमा स्वास्थ्य मन्त्रालय मातहत शक्तिशाली युनिफाइड केन्द्रीय अस्पताल (वीर अस्पताल)को व्यवस्था गरिएको छ । केन्द्रीय अस्पताललाई कोभिड–१९ उपचार र व्यवस्थापनको कमाण्ड दिइएको छ ।