निषेध आदेश थप कडा बनाउन सरोकारवालासँग छलफल

काठमाडौं– काठमाडौं उपत्यकामा जारी निषेध आदेश थप कडा बनाउन उपत्यकाका जिल्ला प्राशासनहरुले सरोकारवालासँग छलफल सुरु गरेका छन्। 

काठमाडौं, भक्तपुर र ललितपुरका प्रमुख जिल्ला अधिकारीहरुले तरकारी किसान लगायतसँग निषेध आदेश थप कडा बनाउने विषयमा छलफल थालेका हुन्।

काठमाडौंकी सहायक प्रमुख जिल्ला अधिकारी कल्पना घिमिरेले निषेध आदेश थप कडा गर्ने सम्बन्धमा छलफल भइरहेको जानकारी दिइन्। ‘तरकारी व्यवसायीसँग छलफल गर्नको लागि सरहरु बस्नु भएको छ,’ उनले भनिन्, ‘छलफलपछि केही निर्णय हुन्छ।’ 

यसअघि कोभिड १९ को दोस्रो लहर नियन्त्रण गर्न भन्दै सरकारले गत १६ वैशाखदेखि उपत्यकासहीत विभिन्न जिल्लामा निषेध आदेश जारी गरेको थियो। तर, संक्रमण दर घट्न नसकेपछि उपत्यका निषेध आदेश थप्ने र कार्यान्वयनमा थप कडाइ गर्ने सम्बन्धमा छलफल भइरहेको सहायक प्रमुख जिल्ला अधिकारी घिमिरेले बताइन्।