गेटा मेडिकल कलेजमा कोभिड-१९ स्याहार केन्द्र सञ्चालन

धनगढी - कैलालीको गोदावरी नगरपालिका-५, गेटामा निर्माणाधीन गेटा मेडिकल कलेजको एउटा भवनमा कोभिड-१९ स्याहार केन्द्र सञ्चालनमा आएको छ। केन्द्र सञ्चालनमा आएसँगै जिल्लाका अस्पतालमा कोरोनाका बिरामीको चाप घट्ने अपेक्षा गरिएको छ।

सुदूरपश्चिम प्रदेशमा बढ्दै गइरहेको कोरोना संक्रमणदरलाई मध्यनजर गर्दै हाललाई ५० शय्याको कोभिड-१९ स्याहार केन्द सञ्चालनमा ल्याइएको सम्पर्क व्यक्ति सर्मानन्द भट्टले बताए। 

जिल्ला कोभिड संकट व्यवस्थापन केन्द्र मातहत रहने गरि सुदूरपश्चिम प्रदेश सरकार, धनगढी उपमहानगरपालिका, गोदावरी र गौरीगंगा नगरपालिकासंगको सहकार्यमा सो आइसोलेसन सञ्चालनमा आएको हो ।

१ महिनादेखि निर्माणको प्रक्रियामा रहेको आइसोलेसन अक्सिजन र जनशक्ति व्यवस्थापनमा ढिलाइ हुँदा सेवा सुरु हुन सेको थिएन । 

आइसोलेसन सञ्चालनका लागि सुदूरपश्चिम प्रदेश सरकारले ५० लाख आर्थिक सहयोग र २० जना स्वास्थ्यकर्मीको पारिश्रमिकको व्यवस्था गरेको छ भने धनगढी उपमहानगरपालिका, गोदावरी र गौरीगंगा नगरपालिकाले स्वास्थ्य सामग्री, उपकरण र जनशक्ती खटाएको सम्पर्क ब्यक्ती  भट्टले बताए । 

केन्द्रमा अक्सिजन सपोर्टमा उपचार गरिने र गम्भीर बिरामीलाई सेती प्रादेशिक र मालाखेती अस्पतालमा पठाइने भट्टले बताए। सुरुमा दुई हजार क्षमता रहेको भवनमा पाँच सय शय्याबाट आइसोलेसन सञ्चालन गरिने बताइएको थियो।