राष्ट्रिय राजनीतिलाई प्रदूषित पार्न खोजियो : ओली

काठमाडौं– प्रधानमन्त्री केपी शर्मा ओलीले राष्ट्रिय राजनीतिलाई प्रदूषित पार्न खोजिएको आरोप लगाएका छन्।

आफ्नो निवास बालुवाटारमा पत्रकार सम्मेलन आयोजना गरेका ओलीले भने, ‘लोकतान्त्रिक प्रक्रियाहरुबाट राजनीतिलाई पथभ्रट बनाउने र अलोकतान्त्रिक प्रणाली र प्रक्रियाबाट राजनीतिको छिनोफानो हुनुपर्छ भन्ने सोचहरु अगाडि आएका छन्।’
लोकतन्त्रको रक्षाका लागि आफूहरु लडिरहेको दाबी उनले गरे।

ओलीले थपे, ‘यस्तो महामारीको अवस्थामा सानातिना राजनीतिक प्रश्नका झमेला छोडेर महामारी नियन्त्रणमा लाग्नुपर्नेमा कोभिड देखा परेदेखि नै सरकार परिवर्तनका खेल सुरु भए। व्यक्तिगत महत्वाकांक्षा, कुण्ठा र आग्रहलाई महत्व दिने र त्यसैलाई अग्रभागमा राखेर जनताले भोगिरहेका समस्याबाट ध्यान अन्यत्र मोड्ने काम भइरह्यो।’