ओली प्रधानमन्त्री भएर चुनाव गराए दुर्भाग्य हुन्छ : शशांक कोइराला

काठमाडौं - नेपाली कांग्रेसका महामन्त्री डा. शशांक कोइरालाले केपी शर्मा ओली प्रधानमन्त्री भएर चुनाव गराए दुर्भाग्य हुने बताएका छन्।

संसदीय दलको कार्यालयमा सांसदहरूको हस्ताक्षर संकलन भइरहँदा सञ्चारकर्मीहरूसँग प्रतिक्रिया दिँदै उनले यस्तो बताएका हुन्।

‘ओलीले जुन हतकण्डा मच्चाएका छन्। उनले प्रधानमन्त्री भएर चुनाव गराए दुर्भाग्य हुन्छ,’ उनले भने,‘सभापति देउवाकै नेतृत्वमा सरकार गठन हुन्छ भन्नेमा हामी विश्वस्त छौं।’

उनले सर्वोच्च अदालतले फेरि पनि संविधानको रक्षा गरेर संसद् पुनःस्थापना गर्नेमा आफूहरू विश्वस्त रहेको भन्दै त्यसपछि गठबन्धनको सरकार निर्माण हुने बताए।

उनले १४९ सांसदहरूमध्ये केहीले हस्ताक्षर नगरे पनि आवश्यक बहुमत बराबर सांसदहरूको हस्ताक्षर हुने बताए। उनले कोभिड महामारीको बेलामा सडक आन्दोलन गर्न असहज हुने भन्दै पहिले सर्वोच्च अदालतको फैसला हेरिने बताए।