काठमाडौंमा उपचाररत पर्साका एक चिकित्सकको मृत्यु

पर्सा - पर्साको वीरगञ्ज हेल्थ केयर हस्पिटलमा कार्यरत एक चिकित्सकको काठमाडौंमा उपचारको क्रममा मृत्यु भएको छ। मृत्यु हुनेमा वीरगञ्ज महानगरपालिका-३, चपकैयाँका २९ वर्षीय डा. मुराद हुसेन रहेका छन्।

एक महिनाअगाडि बंगलादेशमा एम.ए. अर्थोपेडिक गरेर नेपाल फर्किएका उनी वीरगञ्ज हेल्थ केयरमा काम गर्दै आएका थिए। वैशाख २१ गते कोभिड परीक्षण हुँदा उनीसहित पाँचजना चिकित्सक संक्रमित थिए। 

वीरगञ्ज हेल्थ केयरमै उपचार भइरहँदा स्वास्थ्य अवस्थामा सुधार हुन नसकेपछि १० दिनपछि जेठ १ गते उनलाई हेलिकप्टरमार्फत् काठमाडौंको मेडिसिटी हस्पिटलमा भर्ना गरिएको थियो।

कोभिडको पहिलो डोज मात्रै लगाएका उनलाई सास फेर्न गाह्रो भएको र कडा प्रकारका निमाेनिया रहेको वीरगञ्ज हेल्थ केयर हस्पिटलका सञ्चालक डा. अबुल हैस अन्सारीले बताए। तीन/चार दिन अगाडि बुझ्दा स्वास्थ्यमा सुधार भएको भन्ने बुझिएको थियो तर फाेक्साेमा नै समस्या भएकाले उनको उपचारका क्रममा मृत्यु भएको डा. अन्सारीले बताए।

संक्रमित अन्य चारजना चिकित्सकमध्ये अर्का एक चिकित्सकबाहेक सबैको स्वास्थ्य अवस्था सुधाराेन्मुख रहेको वीरगञ्ज हेल्थ केयर हस्पिटलले जनाएको छ।