कोरोना कहर : कैलालीमा जेष्ठ नागरिकको मृत्यु दर उच्च

धनगढी- कोभिड-१९ को पहिलो लहरमा जेष्ठ नागरिकको मृत्यु दर उच्च रहेको कैलालीमा दोस्रो लहरमा पनि मृत्यु उच्च रहेको छ। 

सुदूरपश्चिम प्रदेश कोभिड–१९ को ‘हटस्पट’ कैलालीमा कोरोनाको पहिलो लहरमा जेष्ठ नागरिकको मृत्युदर ४८.७८ प्रतिशत थियो। २०७७ जेठ २४ गते पहिलो कोरोना संक्रमितको मृत्यु भएको कैलालीमा फागुन ३० गतेसम्म १२ महिलासहित ४१ जनाको मृत्यु भएको थियो।

सो अवधिमा ५० देखि ४९ वर्ष उमेरका ६ महिलासहित १४ जना, ४० देखि ४९ वर्ष उमेरका ५ जना पुरुष र ३० देखि ३९ वर्ष उमेरका एक महिला र एक पुरुषको मृत्यु भएको थियो। 

कोभिड–१९ को दोस्रो लहरमा पनि जेष्ठ नागरिकको मृत्यु दर उच्च रहेको छ। कोरोना भाइरसको दोस्रो लहरमा जिल्लामा १९३ जना कोरोना संक्रमितको मृत्यु भएको छ। 

दोस्रो भेरियन्ट चैत्र १ गतेदेखि जेठ ८ गतेसम्म जिल्लामा ५८ महिलासहित एक सय ९३ जनाको मृत्यु भएको छ।
जिल्ला प्रशासन कार्यालय कैलाली जिल्ला आपतकालीन कार्य संचालन केन्द्रका अनुसार कुल मृत्युमध्ये ३५.७५ प्रतिशत ६० वर्षमाथिका रहेका छन्। केन्द्रका अनुसार चैत्र १ देखि जेठ ८ गतेसम्म जिल्लामा ६० वर्षमाथिका २६ महिलासहित ६९ जनाको मृत्यु भएको छ।

जिल्लामा ५० देखि ५९ वर्ष उमेरका संक्रमितको मृत्यु दर २२.२७ प्रतिशत छ। सो उमेर समूहका १२ महिलासहित ४३ जनाको मृत्यु भएको छ।

४० देखि ४९ वर्ष उमेर समूहका १८.६५ प्रतिशको मृत्यु भएको छ। सो उमेर समूहका ७ महिलासहित ३६ जनाको मृत्यु भएको छ।

३० देखि ३९ वर्ष उमेर समूहका १७.६१ प्रतिशको मृत्यु भएको छ। सो उमेर समूहका ८ महिलासहित ३४ जनाको मृत्यु भएको हो।
२० देखि २९ वर्ष समूहका ४.६६ प्रतिशतको मृत्यु भएको छ। सो अवधिमा ५ महिलासहित ९ जनाको मृत्यु भएको छ।
यो अवधिमा ११ वर्षका एक जना बालकको मृत्यु भएको छ। मृत्यु भएकामध्ये १७ जनाको होम आइसोलेसन र अन्यको सरकारी तथा निजी अस्पतालमा उपचारको क्रममा मृत्यु भएको हो।