१४९ सांसदको समर्थनमा प्रधानमन्त्रीकाे दाबी गर्दै शेरबहादुर देउवा

काठमाडौं– विपक्षी गठनबन्धनले नेपाली कांग्रेसका सभापति शेरबहादुर देउवालाई प्रधानमन्त्री प्रस्ताव गर्ने निर्णय गरेको छ।

शुक्रबार सिंहदरबारमा बसेको कांग्रेस, माओवादी केन्द्र, नेकपा एमालेको माधवकुमार नेपाल समूह र जनता समाजवादी पार्टीको उपेन्द्र यादव पक्षका शीर्ष नेताहरुको बैठकमा देउवालाई प्रधानमन्त्रीका रुपमा अघि सार्ने सहमति जुटेको हो। 

१४९ जना सांसदको हस्ताक्षरसहित देउवालाई प्रधानमन्त्री प्रस्ताव गर्न लागिएको कांग्रेस सांसद गगन थापाले जानकारी दिए। कांग्रेसका ६१ र माओवादीका ४८ सांसदले देउवालाई प्रधानमन्त्री बनाउने प्रस्तावमा हस्ताक्षर गरेका छन्।

देउवाको समर्थनमा हस्ताक्षर गर्ने सांसदमा नेकपा एमालेका पनि २७ जना सांसद छन्। त्यसैगरी जसपाका १३ सांसदले हस्ताक्षर गरेका छन्।

संविधानको धारा ७६ (५) अनुसारको सरकार गठनका लागि दावी पेश गर्न विपक्षी दलहरु राष्ट्रपति कार्यालय शीतलनिवास पुगेका छन्।