हिजोको हर्कतको हिसाबकिताब हुन्छ : ओली

काठमाडौं– प्रधानमन्त्री तथा नेकपा (एमाले) का अध्यक्ष केपी शर्मा ओलीले पार्टीमा अनुशासनहिनता र अराजकता नचल्ने चेतावनी दिएका छन्। 

बालुवाटारमा पत्रकारहरुसँग कुरा गर्दै ओलीले पार्टीको माधव नेपाल समूहलाई लक्षित गर्दै भने, ‘हिजोमात्रै पनि उहाँहरुबाट अनैतिक काम भएको छ। त्यसको हिसाबकिताब हुन्छ।’

हिजो राष्ट्रिय सभा सदस्यको उपनिर्वाचनमा माधव नेपाल पक्षका मतदाताले मत नदिएपछि एमालेका उम्मेदवार रामबहादुर थापाले हारेका थिए। 

कर्णाली प्रदेशमा पनि नेपाल पक्षका सांसदले फ्लोर क्रस गरेको स्मरण गर्दै उनले भने, ‘संसदीय व्यवस्थामा यो असाधारण दण्डनीय हो दलीय हिसाबले। समानान्तर कमिटी बनाउनेदेखि सांसदलाई अनुपस्थित गराएर सरकार ढाल्ने प्रयास भएको छ। केपी ओली मन नपरे पनि यो लोकतान्त्रिक आचार भएन भन्ने कुरा भन्नुपर्ला र? 

एउटा मापन, स्ट्यान्डर्ड त हुनुपर्ला नि। लोकतन्त्र भनेको छाडा र अराजक तन्त्र होइन। यो अनुशासित व्यवस्थित प्रणाली हो। यो कानुनको राजमा चल्छ।’