दैलेखमा कोरोना संक्रमणबाट एउटै वडाका ९ जनाको मृत्यु

दैलेख - दुल्लु नगरपालिका-१२, गौरीमा कोरोना संक्रमणबाट एउटै समुदायका ९ जनाको मृत्यु भएको छ।

वडामा कोरोना सङ्क्रमणबाट यति धेरैको मृत्यु भएको दैलेखमा पहिलो हो।

मृतक ६ जनामा कोरोना परीक्षण गरिएको थियो भने अन्य तीनजना छिमेकीमा  ज्वरो आउने, शरीर, छाती दुख्ने र रुघाखोकी आउने लक्षणसहित मृत्यु भएको स्वास्थ्यचौकी गौरीका संयोजक रमेश लम्सालले बताए। 

उनीहरूकाे परीक्षणबिनै बिरामी भएको पाँचदेखि आठ दिनमा मृत्यु भएको लम्सालले बताए। अन्य ६ मध्ये दुईजनाको भारतमा मृत्यु भएको थियो।

बाँकी चारजनाको सुर्खेत र दैलेखमै उपचारका क्रममा मृत्यु भएको स्वास्थ्य संयोजक लम्सालले बताए। यहाँ कामका लागि भारत गएका स्थानीयवासी घर फर्केसँगै १५ दिनभित्र ९ जनाको कोरोनाका कारण मृत्यु भएको हो।

एउटै समुदायभित्र ९ जनाको मृत्यु भएपछि अहिले अवस्था असामान्य बनेको छ। दुल्लु-१२ को एउटै टोलमा १०० भन्दा बढी बिरामी रहेको खबर पाएपछि उपचारका लागि चिकित्सकसहितको टोली लिएर परीक्षणका लागि पुगेको दुल्लु नगरपालिका प्रमुख घनश्याम भण्डारीले बताए।

स्वास्थ्यकर्मी लिएर गाउँगाउँमा गएकाे भन्दै उनले अधिकांशमा ज्वरो र रुघाखोकी रहेको बताए।  औषधिसहित पुगेको स्वास्थ्यकर्मीको टोलीले परीक्षणलाई तीव्र पारेको छ। रासस