उपनिर्वाचनमा थापालाई मतदान गर्न एमालेको ह्विप

काठमाडौं- एमालेले बागमती प्रदेशको राष्ट्रियसभा सदस्यको उपनिर्वाचनमा पार्टीका उम्मेदवार रामबहादुर थापालाई मत दिन ह्विप जारी गरेको छ। महासचिव ईश्वर पोखरेलले प्रदेशसभा सदस्य र बागमती प्रदेशअन्तर्गतका स्थानीय तहका प्रमुख र उप्रमुखलाई मतदान गर्न भन्दै ह्विप जारी गरेका हुन्।

जेठ ६ गते बिहान ९ बजे देखि दिउँसो ३ बजेसम्म हेटौंडामा हुने मतदानमा अनिवार्य उपस्थित भई पार्टीका उम्मेदवारको चुनाव चिह्न सूर्यमा मतदान निर्देशन दिइएको छ। बागमती प्रदेशका लागि राष्ट्रियसभाको उपनिर्वाचन जेठ ६ गते हुँदै छ।

बागमती प्रदेशसभा र स्थानीय तहमा नेकपा एमालेको एकल बहुमत छ। पार्टीको ह्विप अनुसार मतदान भएपछि थापाको जित सुनिश्चित हुनेछ। राप्रपाले पनि थापालाई नै मत दिने निर्णय गरिसकेको छ।उपनिर्वाचनमा विपक्षी नेपाली कांग्रेस, माओवादी केन्द्र लगायतले डा‍. खिमलाल देवकोटालाई अघि सारेका छन्।