कोरोना संक्रमणबाट दाङका पत्रकारको मृत्यु

बुटवल- कोरोना संक्रमणबाट दाङका पत्रकार लक्ष्मण बस्नेतको मृत्यु भएको छ। उपचारका क्रममा सोमबार भैरहवास्थित युनिभर्सल मेडिकल कलेजमा मृत्यु भएको हो। 

दाङको बबई गाउँपालिका–४ निवासी पत्रकार बस्नेत एक दशकदेखि पत्रकारितामा सक्रिय थिए। दाङको रेडियो हापुरेमा स्टेसन मेनेजरसमेत रहेका बस्नेत पछिल्लो समय सोही रेडियोको सञ्चालक समिति सदस्य थिए। ३२ वर्षीय पत्रकार बस्नेतको निधनप्रति नेपाल पत्रकार महासंघ लुम्बिनी प्रदेशले शोक वक्तव्य जारी गरि दु:ख व्यक्त गरेको छ। 

पत्रकार बस्नेतको निधनले लुम्बिनी प्रदेशले एक कुशल र जुझारु युवा पत्रकार गुमाएको महसुस भएको महासंघले जनाएको छ।  प्रदेश महासचिव विक्रम खड्काले शोक वक्तव्य जारी गरि स्वर्गीय पत्रकार बस्नेतप्रति श्रद्धाञ्जली अर्पण गरेका छन्। 

एक दिनअघि मात्रै पनि पत्रकार बस्नेतका पिताको सोही अस्पतालमा कोरोना संक्रमणकै कारण निधन भएको थियो  पत्रकार बस्नेतका पत्नी, एक छोरा र एक छोरी छन्।  कोरोनाकै कारण लुम्बिनी प्रदेशमा तीन पत्रकारको निधन भएको छ भने एक सयभन्दा बढी पत्रकार संक्रमित भएका छन्।