एमालेमा विवाद मिलाउन १० सदस्यीय कार्यदल गठन

काठमाडौं– नेकपा (एमाले)ले पार्टीभित्र चर्किएको विवाद समाधानका लागि १० सदस्यीय कार्यदल गठन गरेको छ।

पार्टी अध्यक्ष केपी ओली र वरिष्ठ नेता माधवकुमार नेपालबीच आज सिंहदरबारमा भएको वार्तापछि दुवैतर्फका ५–५ जना रहने गरी १० सदस्यीय कार्यदल गठन भएको हो। नेता नेपालले आफूले सार्वजनिक गरेको ६ बुँदे प्रस्तावमा रहेर छलफल हुने बताए। 

उनका अनुसार ओली पक्षबाट कार्यदल संयोजक उपनेता सुवास नेम्वाङ छन् भने सदस्यहरुमा उपमहासचिव विष्णु पौडेल, सचिव प्रदीप ज्ञवाली, शंकर पोखरेल र विष्णु रिमाल छन्।

माधव नेपालको पक्षबाट भीम रावलको नेतृत्वमा कार्यदल गठन भएको छ। सदस्यहरुमा उपमहासचिव घनश्याम भुसाल, गोकर्ण विष्ट, सुरेन्द्र पाण्डे र रघुजी पन्त छन्। 

‘मैले वार्ता टोलीलाई तीन दिनको समय दिन भनेँ, प्रधानमन्त्रीले केही दिन समय बढाउँ भन्नुभएको छ,’ नेपालले भने, ‘वार्ता टोलीले नै आवश्यक निर्णय गर्छ।’

अध्यक्ष ओलीले वरिष्ठ नेता नेपालसँगको वार्ता सकारात्मक भएको बताएका छन्। आज सिंहदरबारस्थित प्रधानमन्त्री कार्यालयमा भएको वार्तापछि छोटो प्रतिक्रिया दिँदै ओलीले पार्टीभित्रको विवाद समाधान उन्मुख भएको बताएका हुन्।