महामारीमा नागरिकलाई सही सूचना दिनुपर्छ :  महासंघ अध्यक्ष पोखरेल  

बुटवल - नेपाल पत्रकार महासंघका केन्द्रीय अध्यक्ष विपुल पोखरेलले कोरोना महामारीसँगै आम नागरिकसमेत सूचनाबाट अलग हुने खतरा रहेको बताएका छन्। पत्रकारहरू नै नागरिकका सूचनादाता भएको बताउँदै पत्रकारिता पेशा संकटमा परे जनता सूचनाबाट अलग हुनुपर्ने खतरा रहेको उनले औंल्याए।

नेपाल पत्रकार महासंघ रुपन्देहीले शनिबार आयोजना गरेको कोरोना महामारीमा सञ्चारमाध्याम र पत्रकारको भूमिका विषयक भर्चुअल संवादमा अध्यक्ष पोखरेलले कोरोना महामारीबाट सूचनादाताको संरक्षणमा सबैको ध्यान जान जरुरी रहेको बताए। उनले कोरोना महामारीमा नागरिकले कसरी कोरोना जित्ने र महामारीमा राज्यको भूमिका कस्तो हुने भन्ने सूचना खोजी गरेको बताए। 

कोरोनाविरुद्धको लडाइमा बेथिति धेरै भइरहेको भन्दै त्यसलाई बाहिर ल्याउने कर्तव्य पत्रकाहरूनै भएको बताए।

‘स्वास्थ्य मन्त्रालय बाहेक अन्य मन्त्रालयहरूले यस्तो बेलामा के गरिरहेका छन्,’ पोखरेलले भने, ‘यस्तो बेला पत्रकारहरू मल्टि रोलमा रहनुपर्छ। अतिरिक्त अग्रसरता पनि देखाउनुपर्छ,’ उनले भने।  उच्च स्वास्थ्य सतर्कता अपनाएर फिल्डमा खटिन पोखरेलको पत्रकारहरूलाई आग्रह थियो।

नेपाल पत्रकार महासंघका पूर्वकेन्द्रीय अध्यक्ष तारानाथ दाहालले नेपालको मिडिया उद्योग कोरोनाकै कारण ठूलो संकटमा परेको बताए। ७० वर्षको नेपाली पत्रकारिता इतिहासमा अहिले कोरोनाले थिलोथिलो भएको बताए। 

यस्तै लुम्बिनी प्रादेशिक अस्पतालका कोभिड फोकल पर्सन तथा वरिष्ठ फिजिसियन डा. नन्दु पाठकले फन्टलाइनरलाई भ्याक्सिन लगाउनु अनिवार्य रहेको बताए। डबल मास्क लगाउने, सर्जिकल मास्क लगाउने, भौतिक दूरी कायम गर्ने, साबुनपानीले पटक-पटक हात धुने कार्य अनिवार्य रहेको उनको भनाइ थियो।