प्रतिगामी शक्तिविरुद्ध एकताबद्ध र सचेत संघर्षमा उत्रिन दाहालको आह्वान

काठमाडौं - नेकपा (माओवादी केन्द्र) का अध्यक्ष पुष्पकमल दाहालले परिवर्तन विरोधी प्रतिगामी शक्तिविरुद्ध एकतावद्ध र सचेत संघर्षमा उत्रिन आह्वान गरेका छन्। 

मुस्लिम समुदायको महान् चाड इद–उल–फित्रको अवसरमा शुभकामना दिँदै दाहालले यस्तो आह्वान गरेका हुन्। 

‘संघीय लोकतान्त्रिक गणतन्त्र नेपालको वर्तमान संविधानले नेपाली बहुसंस्कृतिको सम्मान गर्दै पहिचान र आत्मनिर्णयको अधिकार सुनिश्चित गरेको छ,’ शुभकामना सन्देशमा भनिएको छ, ‘अहिले नेपाली जनताको बलिदानीपूर्ण संघर्षबाट प्राप्त हक र अधिकारमाथि प्रतिक्रियावादीहरूबाट प्रहार भइरहेको छ।’

यस्तै उनले मौलिक पहिचानका कारण नेपाली जनसमुदायका बीचमा सदियौंदेखि सहिष्णुता र राष्ट्रिय एकताको भावना जागृत भएको पनि उनले बताएका छन्। बहुधर्म र बहुसंस्कृतिले नै समाजलाई पारस्परिक सम्मानसहित अघि बढ्न अभिप्रेरित गरिरहेको उनको भनाइ छ।