झापामा लम्बियो निषेध आदेश : घर बाहिर ननिस्कन आदेश

झापा - झापामा थप एक साताका लागि  निषेध आदेश लम्बिएको छ।

जिल्ला प्रशासन कार्यालय झापामा बसेको जिल्लास्तरीय कोभिड–१९ संकट व्यवस्थापन केन्द्र डीसीसीएमसीको बैठकले आगामी जेठ ७ गते मध्याराति १२ बजेसम्मका लागि  निषेध आदेश लम्बाउने निर्णय गरेको हो।

झापामा यसअघि वैशाख १९ गतेदेखि पहिलो चरणका लागि  निषेध आदेश लगाइएको थियो। पहिलो चरणको  निषेध आदेश आज राति १२ बजे सकिँदै थियो।

कोभिडका बिरामी जिल्लामा बढेको र मृत्यु दरसमेत उच्च रहेको पाइएपछि  निषेध आदेश जेठ ७ गतेसम्मका लागि  लगाउने निर्णय भएको प्रमुख जिल्ला अधिकारी श्रवणकुमार तिमिल्सिनाले बताए। 

औषधि, स्वास्थ्य सामग्री, इन्धन बाहेक अन्य खाद्यान्न पसल, व्यवसाय पूर्ण रूपमा बन्द गर्ने र हरियो तरकारी, फलफूल, दूध तथा दूधजन्य पदार्थ स्थानीय तह र स्थानीय उद्योग वाणिज्य संघको समन्वयमा बिहान ८ बजेभित्र घरघरमा होम डेलिभरी सेवा उपलब्ध गराउने सकिने निर्णय बिहिबार बसेको  बैठकले निर्णय गरेको हो।

बैठकले औषधि खरिद तथा उपचारका लागि बाहेक कुनै पनि व्यक्ति घर बाहिर ननिस्कने, अत्यावश्यक सेवा सञ्चालन बाहेकका सरकारी कार्यालय, सार्वजनिक संस्थान, बिमालगायतका कार्यालयहरू स्थगन गर्ने निर्णय गरेको छ।