प्रदेश १ मा कोरोनाका १० हजार सक्रिय संक्रमित 

विराटनगर- प्रदेश १ मा कोरोनाको सक्रिय संक्रमितको संख्या १० हजार ६१४ पुगेको छ। मोरङमा मात्र ४ हजार ८४० जना सक्रिय संक्रमित छन्।

झापामा २ हजार ४३१ र सुनसरीमा १ हजार ७२१ जना रहेको सामाजिक विकास मन्त्रालयले जनाएको छ। 

बिहीबार प्रदेश १ मा १ हजार ३९ जना कोरोना संक्रमित थपिएका छन्। दैनिक संक्रमण संख्यामा यो अहिलेसम्मकै उच्च हो। २ हजार १६२ जनाको पीसीआर परीक्षण गर्दा ४४० महिला र ५९९ पुरुषको रिपोर्ट पोजेटिभ आएको मन्त्रालयले जनाएको छ। 

मन्त्रालयका अनुसार मोरङमा ४०५, झापामा २५७, सुनसरीमा १४२, ताप्लेजुङमा ७९, संखुवासभामा ५४, सोलुखुम्वुमा २०, धनकुटामा १७, भोजपुर र उदयपुरमा ९–९, इलाममा ५, पाँचथरमा ३, तेह्रथुममा २, ओखलढुङ्गामा १ र प्रदेश १ बाहिरका ३६ जनामा संक्रमण देखिएको छ। 

प्रदेश १ मा कोरोना संक्रमितको संख्या ४१ हजार ८५६ पुगेको छ। संक्रमित भएकामध्ये ३० हजार ६२७ संक्रमणमुक्त भएका छन्।