चारवटा एकीकृत आइसोलेसन केन्द्र बनाउन उपत्यका मेयर फोरमको प्रस्ताव

काठमाडौं- उपत्यका मेयर फोरमले उपत्यकामा ४ वटा एकीकृत आइसोलेसन बनाउन प्रस्ताव गरेको छ।

सीसीएमसीका संयोजकसमेत रहेका उपप्रधानमन्त्री ईश्वर पोखरेलसँग बिहीबार दिउँसो भएको बैठकमा फोरमले यस्तो प्रस्ताव राखेको हो। बैठकमा उपप्रधानमन्त्री ईश्वर पोखरेलले कोरोनाविरुद्धको लडाइँमा सरकारलाई साथ दिन काठमाडौं उपत्यका मेयर फोरमलाई आग्रह गरेका थिए।

सिंहदरबारस्थित आफ्नै कार्यकक्षमा मेयर फोरमका पदाधिकारीहरुसँग उपप्रधानमन्त्री पोखरेलले कोरोनाविरुद्धको लडाइँमा संघीय सरकारले चालेका कदमलाई कार्यान्वयन गर्ने गरी जनताको जीवन रक्षामा जुट्न आग्रह गरे।

राज्यका सबै तहको एकीकृत प्रयास र नागरिकको सकारात्मक सहयोगबाट मात्रै यो लडाइँमा सफलता मिल्ने उनले बताए। बैठकमा उपत्यका मेयर फोरमका अध्यक्ष एवं काठमाडौं महानगरपालिकाका मेयर विद्यासुन्दर शाक्य, मेयर फोरमका उपाध्यक्ष एवं ललितपुर महानगरपालिकाका मेयर चिरिबाबु महर्जन तथा मेयर फोरमका सचिव मध्यपुर थिमी नगरपालिकाका मेयर मदन सुन्दर श्रेष्ठ सहभागी थिए।

यसैगरी, अक्सिजनको आपूर्तिमा अहिले देखिएको समस्या समाधानका लागि मेयर फोरमले पहलकदमी लिने भएको छ।