परिस्थिति हेरेर निर्णय लिने माधव–झलनाथ पक्षको निर्णय

काठमाडौं– नेकपा एमालेको असन्तुष्ट पक्ष माधव–झलनाथ पक्षले परिस्थिति हेरेर आवश्यक निर्णय लिने निष्कर्ष निकालेको छ। भर्चुअल माध्यमबाट आज बसेको यो समूहको स्थायी कमिटी बैठकले एकदुई दिनमा हुने परिस्थितिलाई हेरेर निर्णय लिने निष्कर्ष निकालेको उपाध्यक्ष युवराज ज्ञवालीले जानकारी दिए। 

‘संसदमा अनुपस्थित हुने निर्णयको समीक्षा र अहिलेको परिस्थितिबारे छलफल गरेका हौं,’ उनले भने।अबको परिस्थितिमा के उपयुक्त हुन्छ त्यो परिस्थिति हेरेर निर्णयमा पुग्ने जिम्मा स्थायी कमिटीलाई दिइसकिएको नेताहरुले बताएका छन्। 

स्थायी कमिटीका अर्का नेता मुकुन्द न्यौपानेले दलहरूको भूमिका, गठबन्धनको पक्षमा बहुमत जुट्ने, नजुट्ने अवस्था हेरेर निष्कर्षमा पुग्नेबारे आजको बैठकमा छलफल भएको जानकारी दिए। बैठकले जसपाको निर्णय के हुन्छ त्यसका आधारमा पनि थप रणनीति बनाएर अघि बढ्ने निष्कर्ष निकालेको छ।